Qırımdaki «gaz borusında diversiya davasınıñ» şaatlarından biri şaatlarğa kelgen qorquzuvlar aqqında bildirdi. Bu aqta «Qırım birdemligi» cinaiy davanıñ mabüsi Nariman Celâlnıñ ömür arqadaşı bergen malümatqa esaslanıp bildire.
Leviza Celâlova qayd etkenine köre, şaatlardan biri mahkemede kimligi belli olmağan insanlar tarafından qorquzuvlar kelgenini açıq ayttı: «Bu diñlevlerge şaat olaraq kelseñiz, yaqın vaqıtta sizge de imaye kerek olur» dep aytqan ekenler.
Celâlovanıñ aytqanına köre, Rusiye kontrolindeki Qırım Yuqarı mahkemesi imaye istegen üç şaatnı sorğuğa çekti. Olarnıñ ad ve soyadları aytılmay. Episi mabüslerni müsbet taraftan añlattı.
Celâlova, şaatlar Nariman Celâl cemaat faaliyetinen oğraşıp, «bir şey saqlamağan edi», dep tasdıqladı, dep ayttı. Şaatlarnıñ fikirince, Celâlnıñ fikirleri ve dünya baqışları bir vaqıt kimsege qarşı degil edi.
Rusiye kontrolindeki Qırım Yuqarı mahkemesi qırımtatar siyasetçisi ve faali Nariman Celâl ve ağa-qardaş Aziz ve Asan Ahtemovlarnıñ apis müddetini 2022 senesi iyülniñ 26-na qadar uzattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
