Rostov-na-Donu Cenübiy okrugınıñ arbiy mahkemesinde Rusiye prokurorı qırımtatar faalleri Ernest İbragimov ve Oleg Fedorovğa «Qırım musulmanları davası» çerçivesinde 15 ve 16 yıl sert rejimli koloniyada qalmalarına üküm etilmelerini talap etti.
«Qırım birdemligi» bildirgenine köre, qabaatlavnıñ esas delili Bağçasaray camisinde gizli qayd etilgen ses oldı, anda qırımlı musulmanlar diniy-uquqiy, siyasiy ve yaşayış meselelerini muzakere ettiler.
Rusiye prokurorı Valeriy Kuznetsov İbragimov ve Fedorovnıñ esas maqsadı «anayasa qurumını devirmek ve akimiyetni zorbalıqnen zapt etmek» edi, dep bildire.
Advokat Lilâ Gemeci Rusiye qabaatlavınıñ delilleri «tüşünilmez bile», dep ayttı.
İbragimov ve Fedorov, Rusiye prokurorınıñ beyanatına köre, ilk 5 yılını apishanede keçirmeli ve azatlıqqa çıqqan soñ 1 yıl areketleri sıñırlı olacaq.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
