Rusiye kontrolindeki Qırım Yuqarı mahkemesi qırımtatar halqınıñ lideri Mustafa Cemilevniñ ğıyabiy ükmüni sertleştirip, 3 yıl apis cezası ve para cezasını berdi. Bu aqta advokat Nikolay Polozov bildirdi.
«Prokurornıñ talabınen ekinci instantsiya mahkemesi ükümni deñiştirdi. Böylece, mahkeme Mustafa Cemilevniñ silânı diqqatsız saqlav ve silâ parçalarını qanunsız saqlav qabaatlavı boyunca afu sebebinden cezasından azat etilgenini lâğu etip, Rusiye Federatsiyasınıñ devlet sıñırını qanunsız keçüv qabaatlavı sebebinden apis cezası 2 yıldan 3 yılğa arttırıldı. Böyle etip, Qırım Yuqarı mahkemesi nariye silâsını diqqatsız saqlav qabaatlavı boyunca ceza 20 biñ ruble para cezası olmalı, dep qarar çıqardı. Silâ parçalarını qanunsız saqlav sebebinden – 1 yılğa azatlıqtan marum etüv. Rusiye devlet sıñırını qanunsız keçüv – 3 yıl apis cezası», – dedi advokat.
Onıñ aytqanına köre, mahkeme sıñırlav tedbirini deñiştirmedi – apiske aluv anından nezaretke almaq.
Polozov bu qararnı istinaf qurulışında şikâyet etmege niyetlene.
Aprelniñ 22-nde Rusiyeniñ nezaretinde olğan Ermeni Bazar şeer mahkemesi qırımtatar haqlınıñ milliy lideri Mustafa Cemilevge ğıyaben üküm çıqardı. O qabaatlı tanıldı, amma aqlama etilmegen esaslarğa köre azat etildi.
Advokat Nikolay Polozov Rusiyeniñ Ermeni Bazar şeer mahkemesiniñ qırımtatar halqınıñ milliy lideri Mustafa Cemilevge çıqarılğan ükümni temyiz etecek ola.
Bundan evel Rusiye qabaatlavı qırımtatar halqınıñ lideri Mustafa Cemilev içün «Rusiye sıñırını qanunsız keçüv» maddesine istinaden üç yıl yaşav tarzı koloniyasında qalmasını istedi.
Qırım MC ve Aqyar şeeriniñ prokuraturası haber etkenine köre, qırımtatar halqınıñ milliy lideri Mustafa Cemilevni Qırımda taqip etken rusiyeli mahkemicelerge qarşı Ukrayina mahkemesine 20 qabaatlav aktını yolladı.
Ukraina prezidentiniñ Qırım Muhtar Cumhuriyetindeki temsilciligi Mustafa Cemilevge qarşı Rusiye cinaiy davasını «siyasiy taqip» dep adlandırdı.
Qırımda 2021 senesi martnıñ 5-nde mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
