Rusiyeniñ Ufa (Başqurtistan) okrugınıñ arbiy mahkemesi «terroristik teşkilâtta iştirak etüvde» qabaatlanğan yigirmi bir kişige qarşı mahkeme qararı çıqardı. Bu aqta İdel.Aqiqatqa üküm çıqarılğanını eşitken mahkemelengenlerniñ aqrabaları haber etken.
Mahkemelengenlerniñ bazıları «terroristi teşkilâtta iştirak etüvden» ğayrı, devletni elge keçirüv teşebbüslerinde de qabaatlanğan. Aramis Fazılovqa - minimal muddet olaraq umumiy rejimli koloniyada beş yıl qaluv cezası tayinlengen. Oleg Semönov başında olmaq üzre, mahkemelengenlerniñ digerleri sekiz yıl ile 24 yıl apis cezası alğan.
Qabaatlanğanlarnıñ ekseriyetine 400 ile 700 biñ rublelik cöreme tayin etilgen. Mahkeme qararı mahkemelengenlerniñ aqrabaları yanında ilân etilgen.
Daa evel mahkemeci Semönov uquqimayeci Alimira Jukovanı mahkeme soñuna qadar çıqarıp yibergen. Ayrıcamahkemeci mahkeme soñuna qadar mahkemelengen Rinat Nurlıgayanov ve Şamil Şaripovnı çıqarıp yibergen.
Jukovanıñ sözlerine köre, qabaatlavlar bütünley gizli şaat ve Rusiye FSB hadimleriniñ şaatlıqları üzerinde qurulğan. Rusiyeniñ «Memorial» uquqimaye merkezi olarnı siyasiy mabüs dep tanıdı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
