Link açıqlığı

Saatnıñ esas haberi

Vitaliy Portnikov: İşğalciniñ qorqusı


Qurulayatqan Keriç köprü ve Tuzla adasınıñ kötünişi
Qurulayatqan Keriç köprü ve Tuzla adasınıñ kötünişi

Специально для Крым.Реалии

İşğal etilgen Qırımnıñ ukümeti Tuzla adasınıñ bir qısmını federal mülkiyetke bermege qarar berdi – bu tamam şu ada ki, rusiyeliler onı 15 yıl evel, onıñ aynı şu, «qardaşlarına ait» ve «muqaddes» olğan Qırım adasınıñ bir qısmı olğanına baqmadan, Ukrainadan tutıp alacaq ediler. Ve işte, şimdi onı parça-parça etip, tutıp almağa başladılar.

Bunıñ ne keregi bar, degen sual peyda olmaq mümkün. Bütün Qırım endi zapt etildi ki. Ve bütün Qırım endi Rusiye Federatsiyasına «kirsetildi» ve qanunğa, sağlam fikirlevge, adaletke ve tarihqa (em de BMT Baş assambleyasınıñ rezolütsiyasına) rağmen işğalci devletniñ Anayasasında añıldı. Bu alda rusiyelilerge Qırımdan Tuzlanı hırsızlamağa ne kerek?

Kremlde, Qırımnıñ çoq vaqıt Rusiyeniñki qalmaycağınıñ añlayışı bar. Öyle olsa, ne içün satqınlarğa eñ azından Tuzlanı alıp bermekni sadece buyurmamalı?

​Mence, bu sualniñ cevabı pek qolay: işğalciniñ qorqusı. Daa doğrusı, Qırımnıñ çoq vaqıt Rusiyeniñki qalmaycağınıñ ve hırsızlanğan şeyni qaytarmaq kerek olacağnınıñ nasıldır, ayvanlarğa has añlayışı. Öyle olsa, ne içün keç qalmadan evel hırsızlanğan Qırımdan, anda yaramay turğan er şeynı almamalı? Ne içün satqınlarğa (öz devletine hainlik etken memurlarğa) eñ azından Tuzlanı alıp bermekni sadece buyurmamalı?

Bu taktikada yañı bir şey yoq. Şeklen «Sovet» olğan Latviya, Estoniya ve Litva Sovet Birliginiñ başqa cumhuriyetleri kibi birer cumhuriyet ediler. Öyle ise ne sebepten Latviyanıñ işğalinden soñ ondan Abrene uyezdi – şimdi Pskov vilâyetiniñ Pıtalovskiy rayonı RSFSCniñ menfaatı içün hırsızlandı? Ne içün Estoniyanıñ işğalinden soñ bu küçük devletniñ Narvanıñ tarihiy Yannlinn-İvangorod rayonı ile bir qısmı Rusiyeniñ Pskov ve Leningrad vilâyetlerine qoşuldı? Ne içün Ekinci cian cenkinden soñ Şarqiy Prussiyanıñ bir qısmı, tarihiy Küçük Litva, Sovet Birligine berilgende onı Rusiye Federatsiyanıñ qısmı yaptılar – em de, onıñ bu cumhuriyet ile ne umumiy sıñırı, ne de tarihiy alâqası olğanını baqmadan yaptılar. Aynı zamanda Litva ile bar edi. Litvalılarnıñ edebiy tili şekillengen, büyük Doneylaytis doğğan, litvalılarnıñ birinci kitabı ve birinci grammatikası neşir etilgen yer tamam o yer edi. Lâkin buña rağmen Kenigsberg Karalâuças degil de, Kaliningrad oldı. Bu meşur şeerde peyda olğanından berli rus adı bile olmadı. Litvalılar tarafından berilgen adı ise er vaqıt bar edi.

Eminim ki, Putin ve ortaqları içün Qırım – kene de Ukrainadır. Olar sadece bu topraqnı ve onıñ ealisini aldılar

​Öyle ile ne içün? Mence, kene de qorqqanları içün. Çünki erte-keç qaytarmaq kerek olacağını añlay ediler. Öyle ise, daa soñra Rusiyede qaldırıla bilecek topraq ne içün Baltiya devletlerinden hırsızlanmasın? «Kreml aqsaqalları» «internatsionalizm» aqqında ne dese, desinler, olar içün er vaqıt yalıñız Rusiye öz ülke edi. Bütün qalğanlar ise – mustemlekeler, zapt etilgen territoriyalar, kelecekteki duşmanlar ediler.

Şimdi de aynı şeyni köremiz. Eminim ki, qolayca qandırılğan tebaalarına nasıl masallar oqusa, oqusınlar, Putin ve ortaqları içün Qırım – kene de Ukrainadır. Olar sadece bu topraqnı ve onıñ ealisini, tıpqı Donbass, Pridnestrovye, Abhaziya ya da Cenübiy Osetiyanı kibi, reine olaraq aldılar. Ve anda orduları ve ukümeti olğance – mabüslerniñ mal-mülküni hırsızlaylar. Yañı bir şey yoq. Abhaziyada da daa yaqında Rusiye ile topraq davası bar edi. Pridnestrovye sakinlerini pensiyalar ile şantaj ete ediler. Osetinlerni «qarlı inqilâp» vaqtında zornen dağıtıp, öz prezidentlerini saylamğa bemey ediler. Donbassnı sadece er kün mahv eteler. Qırımda ise repressiyalar teşkil ete, qırımtatar halqını sındırmağa tırışa ve territoriyalarnıñ ayrı qısımlarını hırsızlaylar..

İşğal deseñ işğal.

«Fikirler» rubrikasında ifadelengen noqtai-nazarlar, muelliflerniñ öz noqtai-nazarını ifade ete ve muarririyetniñ noqtai-nazarını er vaqıt ifade etmeyler.

XS
SM
MD
LG