Qırımtatar Milliy Meclisiniñ rehberleri, yılda bir kere ötkerilgen çetel diplomatları ile körüşüvlerinde Qırımda insan aqlarınıñ bozuluvı ve Qırım Ukrainanıñ kontroli altına qaytmağance Rusiyege qarşı sanktsiyalarnıñ uzatılmasını muzakere ettiler. Bunı Qırım.Aqiqat içün bergen izaatta qırımtatar halqınıñ lideri, halq deputatı Mustafa Cemilev bildirdi.
Cemilev: «Esas maqsat – işğal şaraitinde tamır Qırım halqınıñ problemaları ve bu yönelişteki halqara emekdaşlıq aqqında laf etmek. Yetekçi dünya devletleriniñ 15 qadar vekili çıqışta bulundı. Olar episi, tek manalı sözlerni qullanaraq, Qırımnıñ işğali toqtatılmağance işğalci devletten sanktsiyalarnıñ alıp taşlanmaycağını ayttılar. Bizge qalsa, biz, tabiiy ki, olarnıñ sertleşecegini eşitmek ister edik. Diger devletler, Qırımda olıp keçkenlerini daima kontrol altında tutacaqlarını ayttılar», – dedi.
Qırımtatar Milliy Meclisi reisiniñ muavini Nariman Celâl, körüşüvde çetel diplomatları, devletleriniñ Ukraina topraq bütünligine qol tutqanını tasdiqladılar, dedi.
Celâl: «Mundericelerine köre eñ tolu çıqışlar, Türkiye ve AQŞ vekillerinde edi. Bugün dünya devletleriniñ elçilerinden yañğırağan baş mesaj, Ukrainanıñ topraq bütünligine dair yanaşuvnıñ deñişmeyceginden ibaret edi. Olarnıñ bundan soñki emegi ise, Rusiyeni areketleriniñ hatalı ve qanunsız olğanını tanımağa mecbur etmekten ibarettir», – dep qayd etti.
Ukraina Tış işleri nazirliginiñ rehberi Pavlo Klimkin, yılda bir kere ötkerilgen Qırımtatar Milliy Meclisi liderleriniñ çetel devletleriniñ elçileri ile körüşüvinde ilhaq etilgen Qırımda Rusiye prezidenti saylavınıñ ötkerilmesini taqbih etken Ukraina ortağı devletleriniñ beyanatlarını selâmladı ve bu saylavnı teşkil etken adamlarğa qarşı sanktsiyalarnı tatbiq etmege davet etti.
Mart 13-te Kyivde Qırımtatar Milliy Meclisi liderleriniñ çetel devletleriniñ elçileri ile yılda bir kere ötkerilgen ananeviy körüşüvi başlandı. Onda Meclisniñ liderleri Qırım işğaliniñ toqtatılması ve ondan soñ yarımadanıñ qırımtatar muhtariyeti sıfatında keri qaytması meselelerini muzakere ettiler.
Bunun arfesinde Qırımtatar Milliy Meclisi, muracaatname yayınlap, içinde qırımtatarlarnı ilhaq etilgen Qırımda Rusiyeniñ prezident saylavında iştirak etmemege davet etti.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
