Suvdağda «Qırım birdemligi» cemiyet teşebbüsiniñ oturışuvına Rusiye OMONınıñ hadimleri keldi.
Telükesizlik hadimleriniñ aytqanlarına köre, olarğa «bu adres boyunca silâlı toplaşuv keçe», dep telefon ettiler. Aqşamğa qadar 100-ge yaqın OMON hadimi vesiqalarnı teşkere ve ifadeler ala ediler. Aq-uquq qorçalayıcısı Abdureşit Cepparovnıñ fikrine köre, telükesizlik hadimleriniñ maqsadı, tedbirni toqtatmaq ve faaliyetçilerni qorquzmaq edi. Lâkin «Qırım birdemligi» toplaşmağa devam etecek, dep işandıra o.
Navalnıynıñ «öç»ü
Rusiyede muhalefet lideri Aleksey Navalnıynıñ tarafdarları tedbir ötkerdi. Merkeziy saylav komissiyası (TsİK) onı namzet olaraq qayd etmekni red etken soñ siyasetçi adamlarnı prezident saylavını boykot etmege davet etti. Devletniñ bir qaç şeerindeki narazılıq tedbirlerinde telükesizlik hadimleri 250-den ziyade kişini ve şu cümleden Navalnıynıñ özüni yaqaladılar. Aynı zamanda Rusiye İİN iç bir yaqalavlar aqqında haber etmey.
Çubarov qorantası, KHV ve içtimaiy ağlar aqqında
Qırım.Aqiqat Qırımtatar Milliy Meclisi reisi Refat Çubarov ile büyük intervyü azırladı. Birinci sevgi, balalar, eksiklikler ve yararlıqları – bütün bular intervyüniñ birinci qısmında yer alalar. Ondan ğayrı, Çubarov özüniñ Facebooktaki birinci postunı nasıl yazğanını ve onda KHVniñ «qara cedveli» barmı ya da yoqmı, ikâye etti. Daa tafsilâtlı surette mında oquñız.
«Rusiyeniñ bataqqa soñki yükselüvi»
AQŞ Ukrainadaki tecavuz içün Rusyeniñ ayrı şahısları ve şirketlerine qarşı sanktsiyalar cedvelini kenişletti. Şu cümleden sanktsiyalar Aqyar valisi Dmitriy Ovsânnikov ile Qırımğa Siemens turbinalarını ketirgen «Tehnopromeksport» şirketine qarşı tatbiq etildiler. İçtimaiy ağlarda Rusiyege qarşı yañı sıñırlavlar ne derecede tesirli olğanını muzakere eteler.
FSB Qırımda nasıl çalışa
Biz Rusiye telükesizlik hadimleri tarafından çıqarılağan Bağçasaraydaki eki mahsus operatsiyanıñ eksklüziv videosını elde ettik. O zaman – bu yılnıñ aprel ve oktâbr aylarında – bir sıra Qırım faaliyetçilerini tevqif ettiler. OMON ve FSBniñ Qırımda qullanğan usullarını añlamaq içün jurnalistler ve mutehassıslar er bir kadrnı talil ettiler. Neticelerini «Qırım.Aqiqat» teleleyhasınıñ yañı yayınında baqıñız.
Qısqadan
Ukraina boksçısı Aleksandr Usik Halqara boksçı super seriyasınıñ finalına çıqtı.
Ukraina İİN Qırım ve Aqyar devriye polisiniñ meydanğa ketirilgenini bildire.
Aqyarda orduğa çağırılğan eki yüz genç Rusiyege yemin ettiler.
Çehiyadaki saylavda Rusiyeniñ tarafını tutqan prezident Miloş Zeman tekrar saylandı.
Eñ soñunda daa bir video
Telükesizlik hadimleri tarafından toqtatılğan «Qırım birdemligi»niñ oturışuvından reportajnı baqıñız.
