İnsan aqları boyunca Qırım alâqa grubunıñ koordinatorı Abdureşit Cepparov, «Qırım birdemligi»niñ faaliyetçileri, telükesizlik hadimleriniñ artqan diqqatına baqmayıp, toplaşuvlarını toqtatmaq niyetinde degiller. Bunı o, Qırım.Aqiqatqa bildirdi.
Aq-uquq qorçalayıcınıñ fikrine köre, yanvarniñ 27-sinde Suvdağda «Qırım birdemligi»niñ oturışuvına basıp kirgen telükesilik hadimleriniñ esas maqsadı, tedbirniñ toqtatıluvı ve, kelecekte toplaşmasınlar dep, faaliyetçilerniñ qorqutıluvı edi.
Abdureşit Cepparovnıñ aytqanına köre, Suvdağdaki toplaşuv bu yılda birinci ve «Qırım birdemligi» meydanğa ketirilgen soñ 22-ncisi edi. Onda Qırımnıñ türlü bölgelerinden kelgen 150 Qırım sakini iştirak etti. Aynı zamanda, aq-uquq qorçalayıcısınıñ aytqanına köre, bugün oturışuvğa kelgen telükesizlik hadimleri de yüzden az değil edi.
Olar tahminen saat 18.30-ğa qadar vesiqalarnı teşkerdi ve ifadeler aldılar. Eñ sonunda bir grup advokatlarnen beraber biz kettik. Biz buña daa qarşılıq bildirecekmiz, şimdi endi pek küçlü aks-sada bar.
Yanvarniñ 27-sinde Suvdağda «Qırım birdemligi» cemiyet teşebbüsiniñ oturışuvına Rusiye OMONınıñ hadimleri keldi.
Telükesizlik hadimleri, olarğa «bu adres boyunca silâlı toplaşuv keçe», dep telefon etkenlerini bildirdiler.
Al-azırda Qırım uquqqoruyıcıları tarafından bu vaziyetke dair izaat berilmedi.
İlhaqtan soñ Qırımnıñ ameldeki Rusiye akimiyeti tarafından mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapıla.
