Yanvarniñ 27-nde Sudaqta keçken «Qırım birdemligi» cemaat teşkilâtınıñ toplaşuvına rusiyeli OMON hadimleri yetişip kelgen. Bu aqta Qırım.Aqiqatqa rusiyeli Azatlıq Radiosınıñ muhbiri haber etmekte.
Küç idaresi hadimleriniñ sözlerine köre, birisi telefon açıp, «şu adreste silâ bulundırılğan bir toplaşuv keçirile» degen eken.
Binanıñ ögüne içinde 15-ke yaqın rusiyeli OMON hadimi olğan eki dane avtozakmaşnası kelip toqtağan.
Biraz vaqıt keçken soñ toplaşuv devam etken, ancaq küç idaresiniñ hadimleri «Qırım birdemligi»niñ toplaşuvı keçken binanı terk etmegenler.
Şimdilik Qirim uquqqoruyıcı organlarınıñ bu vaziyetten alâqalı izaatı yoq.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
