Link açıqlığı

Qırımtatar resurs merkezi idaresiniñ reberi, qırımtatar Milliy Meclisiniñ azası Eskender Bariyev Qırımdan 2015 senesi yanvar ayında ketken edi. Buña onıñ faal Ukraina tarafdarı olğanı sebep olğan edi. İlhaq etilgen yarımadada onıñ qart ana-babası qaldı. Dekabrniñ 21-nde Bariyev, olarğa Rusiye FSBsiniñ Qırım idaresinden celpname kelgeni aqqında haber etti.

Yanvarniñ 1-nde Eskender Bariyevniñ aqrabalarını İnsan aqları boyunca Qırım kontakt gruppasınıñ koordinatorı Abdureşit Cepparov ziyaret etti.

«Qırımda bizim uquqimayesi missiyalarımızdan biri – küç idaresiniñ basqısı altında qalğan insanlarğa konsultativ ve maneviy yardımdan ibaret. Onıñ içün, Eskender Bariyevniñ aqrabaları FSBge çağırılğanı aqqında eşitip, biz onen bağlandıq ve olarnı ziyaret etmege izin alğan soñ, onıñ evini ziyaret ettik», – dep ikâye ete Qırım.Aqiqatqa Cepparov.

Onıñ qayd etkenine köre, Eskender Bariyevniñ soylarınıñ sağlığı vaziyeti küç idarelerine sorğulanmaq içün barmağa fırsat bermey:

«Eskenderniñ babası pek hasta, saqat birisi, üç kere insult keçirgen, sağ tarafı bütünley areketsiz. Ömür arqadaşı onı qaşıqnen aşata. İşte, bu alda olğan insanğa FSBden celpname kele».

Abdureşit Cepparov (solda) ve Eskender Bariyevniñ anası Dilâra ve babası Enver
Abdureşit Cepparov (solda) ve Eskender Bariyevniñ anası Dilâra ve babası Enver

Cepparovnıñ sözlerine köre, Bariyevniñ soylârı FSBge çağırıluvı birinci sefer degil eken.

Bu Eskenderniñ faalligi sebebinden yapılğanını añlamaq qıyın degil
Abdureşit Cepparov

«Eskenderniñ anası aytqanına köre, FSB olarnı Herson vilâyetinde elektrik direkleri patlatılğan soñ da çağırğan eken. Bu sefer sağlığı olmağanı içün Ekenderniñ ne anası, ne de babası ceplname esasında FSBge barmağanlar. Qardaşı küç idaresiniñ hadimleri ne aqqında sorağanlarını aytıp oturmadı, çünki taqiqatçığa subetni sır etip saqlaycaqlarına dair senet bergen ekenler.Lâkin bu Eskenderniñ faal ictimaiy-siyasiy faaliyeti sebebinden yapılğanını añlamaq qıyın degil», – dep haber ete uquqimayecisi.

Abdureşit Cepparov Eskender Bariyevnen bağ tutqanı aqqında ayta.

«Eskenderniñ davetine binaen, bıltır yazda men Jenevada keçken tamır halqlar aq-uquqları boyunca BMT (OON) Ekspert mehanizminiñ 10-ncı sessiyasında iştirak etken edim. Zenaatdaşımnıñ nasıl çalışqanını öz közlerimnen kördim. Bu – pek qıyın olğan aqıl ve vucut emegi talap etken bir iş. O, em muzakerelerde iştirak etip yetiştire, em sergiler teşkil ete, elinde eksponatlar tolu ağır çantanen musafirhane ve avalimanlarda yüre», –dep ayta Qırım.Aqiqatqa uquqimayecisi.

Eskender Bariyevniñ ana-babası yaşağan odanıñ dolabı üstünde 10 rublelik demir paralar paketi tura - bular yañı «Qırım marafonı» içün. Aynı yerde, özüniñ vatandaşlıq pozitsiyası sebebinden Qırım ve aqrabalarını terk etip ketmege mecbur olğan Eskenderniñ toy fotoresmi tura.

Dilâra Bariyeva
Dilâra Bariyeva

Bariyevniñ aqrabaları uquqimayecisine bir yıl devamında olarnıñ evi üstünde qırımtatar milliy bayrağı asılıp turğanı aqqında ikâye etip bereler. Yaqında ipranğanı sebebinden, olar onı alıp taşlamağa mecbur qalğanlar. Ancaq onıñ ailesi, bunıñ içün olarnı kimse qorquzmağanı ve bir daa, amma bu sefer yañısını asacaqlarına inandıralar.

XS
SM
MD
LG