AQŞ Mudafaa naziri Cim Mattis, Vaşingtonnıñ Ukrainağa yañı silâhlar bermege qararından soñ AQŞnıñ Donbasstaki çatışmada rolü deñişmey ve bu, Moskvanı raatsız etmemeli, dep saya. Bunı Azatlıq Radiosı bildire.
Nazir, daa evel çıqqan AQŞ Devlet departamentiniñ Ukraina içün «kenişletilgen mudafaa imkânlarınıñ» berilmesi aqqında bildirüvni birinci kere izaat etip: «Men, Ukrainada AQŞ oynağan arbiy rolüniñ deñişkenini körmeyim… Şimdi olarnıñ (Ukrainanıñ – QA) ordusını NATOnıñ standartlarına azırlamağa yardım etken bir qaç keñeşçi bar», – dedi.
Mattis, Ukrainağa yañı silâhlarnıñ berilmesi, bu adım Vaşingtonnı Donbassta Rusiye tarafından kol tutuvnı körgen uruşmacılar ile çatışmağa daa ziyade qarışmağa mecbur etecek, degen spekulâtsiyalarğa baqmadan, AQŞta bu yerdeki mevcüt olmasını arttırmaq içün nasıldır bir plannıñ bar olması añlamına kelmey, dedi.
Ondan ğayrı, Mattis, Ukrainada soñki altı ay zarfında amerikalı muşavirlerniñ sayısı deñişmedi, dep qayd etti.
«Böylelikle, AQŞnıñ arbiy rolü deñişmeyip qala», – dedi o.
Daa evel Moskva, AQŞ «çizgini keçti» ve «açıqtan yañı qan tökülüvine itey», dep, Vaşingtonnıñ Ukrainağa yañı silâhlarnıñ berilmesi aqqında qararını taqbih etti.
AQŞ, Ukrainağa nasıl silâhlar berilecegini añlatmadılar, lâkin Amerika kütleviy haber vastaları, bu silâhlar arasında «Cavelin» tipinde tanklarğa qarşı raketa kompleksleri olmaq mümkün, dep bildireler.
Donbasstaki arbiy çatışma Qırım Rusiye tarafından ilhaq etilgen soñ, 2014 senesiniñ baarinde başlandı. Ukraina ve Ğarp Rusiyeni separatistlerge qol tutuvında qabaatlaylar. Kreml bu qabaatlavlarnı red ete ve Donbassta olsalar bile, rusiyeli «göñülliler» bardırlar, dey. BMTniñ malümatına köre, çatışma esnasında 10 biñden ziyade kişi elâk oldı.
