Ukraina Tış işleri nazirligi (TİN) BMT Baş Assambleyası tarafından Qırımda insan aqlarınıñ bozuluvı aqqında yañartılğan qararnıñ qabul etilmesini selâmlay ve bundan söñki adım, yarımadanıñ işğalden azat etilmesi olmalı, dep bildire.
Ukraina TİNiniñ bildirüvinde aytılğanı kibi, «bugün bunıñ içün endi temel atıldı».
Tış siyaseti muessisesinde, qabul etilgen «Qırım Muhtar Cumhuriyeti ve Aqyar şeerinde (Ukraina) insan aqları saasında vaziyet» serlevalı qarar, «halqara cemaatçılığınıñ, Ukrainanıñ topraq bütünligine qol tutuv boyunca qatiy noqtai-nazarını mantıqiy ve izçen surette tasdıqlay», dep qayd ettiler.
Tış işleri nazirligi: «Qırım meselesinde bizim noqtai-nazarımızğa keniş surette qol tutuv, Rusiye işğalci akimiyetine halqara cemaatçılığı tarafından açıq bir signal yollanğanını tasdiqlay – Qırım meselesi qapatılmadı, dünya işğalciniñ areketlerini diqqatnen közete ve, demek, taqipler ve Qırım sakinlerinde olğan aqlarnıñ bozuluvında qabaatlı olğanlar mutlaqa cezalanacaqlar. İşğalci devlet, vaqtınca işğal etken territoriyasında qanunsızlıqnı toqtatmaq ve halqara uquqnıñ eda etilmesini temin etmek kerek», – dep beyan etti.
Ukraina nazirligi, «ondan ğayrı, bu yıl Baş assambleyanıñ, Qırımnı Rusiyeniñ işğalinden azat etmek içün yapılğan ğayretlerge qol tutqanı aqqında söylegenini» de selâmladı.
Dekabrniñ 19-nda BMT Baş Assambleyası «Qırım Muhtar Cumhuriyeti ve Aqyar şeerinde (Ukraina) insan aqları saasında vaziyet» serlevalı qararnı soñ şekilde qabul etti.
Rey berüv neticesinde 70 ülke vesiqanıñ qabul etilmesine ses berdi, 26 ülke qarşı çıqtı ve 76 ülke rey berüvde iştirak etüvden vazgeçti. Ermenistan, Beyazrusiye, Rusiye, Suriye, Zimbabve ve diger ülkeler bu qararğa qarşı rey berdiler.
Vesiqada Rusiyeden, BMT Halqara mahkemesiniñ Qırımda Qırımtatar Milliy Meclisiniñ yasaq etilmesini lâğu etüv ve yarımadada ukrain ve qırımtatar tillerinde tasil alınmasını temin etüv boyunca tevsiyelerindeki muvaqqat tedbirlerni amelge keçirmesi talap etile.
Qırımnıñ Rusiyege tabi yolbaşçısı Sergey Aksönov Qırım boyunca qararnıñ leyhasına, «Rusiyege qarşı hibrid cenkinde qullanılğan silâ» dedi.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
