Link açıqlığı

Qırımlı mabuslarnıñ ballarına yardım etken «Bizim balalar» içtimaiy fondınıñ cedveli 100 nefer balağa qadar artqan. Bu cedvelde, Qırımda siyasiy repressiyalar aqibetinde baba desteginden marum qalğan çağına yetmegen balalar kirmekte. Oktâbrniñ 11-nde Bağçasarayda daa altı qırımlı tevqif etilgen soñ daa 27 balanıñ adı bu cedvelge tüşti.

Oktâbrniñ 14-nde yarımadanıñ er tarafında 100-ge yaqın qırımlı, bir kişilik piketlerge çıqıp, Qırım musulmanlarına berilgen eziyetke qarşı itiraz bildirid. Rusiyeniñ silâlı hızmetleri, ellige yaqın narazıcı tutulıp, soñra yiberilgenini haber etti.

Qırımda rusiyeli silâlı hızmetlerge qarşı bir kişilik piketler keçirildi (fotoresim galereyası)

Qırım kontakt gruppasınıñ koordinatorı Abdureşit Cepparovnıñ fikirine köre, Kreml Qırım musulmanlarınen qonuşmaq içün repressiyalardan ğayrı başqa til bilmey.

Bizge öz aqlarımız içün barışıq usullarnen küreşmek qala. Sizni ezmege isteseler, öz özüñizni teşkil etmek pek müimdir

– Cumaertesi künü tutulğan faillerden, esas olaraq, ifadeler alındı, soñra ise olar yiberildi. Asılında, ne içün bir kişilik piketler sebebinden adamlar tevqif etile, silâlı hızmetler bunı añlatmağa tırışmadı bile. Ğaliba, ameldeki rus qanunları olar içün ferman degil, istegenleri kibi yapalar. Rusiye, sanki «havuç ve sopa» usulınen qırımtatarlarnıñ riayetkârlığını qazanmağa istey, degen fikirni eşitmek pek oşlu ola. Sopa bar, amma havuç yoq. Kremlde, riayetkârlıq qazanmaq içün bir de bir teklifler yapmağa alışqın degiller, – riayet etmelisiñ, ve o qadarlıq. Bizge ise öz aqlarımız içün barışıq usullarnen küreşmek ve bir birimizni desteklemek qala, şu cümleden «Qırım birdemligi» ve «Bizim balalar» kibi birleşmeler vastasınen. Sizni ezmege isteseler, öz özüñizni teşkil etmek pek müimdir.

Abdureşit Cepparov
Abdureşit Cepparov

Qırımtatar milliy areket faili Nariman Celâl, «Bizim balalar» birleşmesiniñ peyda oluv ikâyesini tarif ete.

– Milliy Meclis, hatırlağanıñız kibi, Rusiyede ve Qırımda yasaqlanğanı sebebinden gizlenmek mecbur oldı. Aynı zamanda, esas teşkilâtımıznıñ resmiy surette çalışıp olamağanı sebebinden, eksiklerni tekmillemek içün, bazı cemaat teşebbüsleri peyda olıp başladı. «Qırım birdemligi» kibi teşkilâtlarğa büyük sayıda gençlerniñ qoşulğanı – pek yahşı. «Bizim balalar» – bu bir-qaç şahısnıñ teşebbüsidir, o qırımlı, ukrainalı jurnalist Lilâ Bucurovanıñ sayesinde peyda olğan edi. Birinci qırımlılar uydurılğan sebeplerden apis etilgen soñ, olarnıñ çoq balalı aileleri bar olğanı malüm oldı, ve bu ballarğa yardım berilmek kerek olğanı añlaşıldı. Qalğanları bu ğayeni destekledi.

Nariman Celâl
Nariman Celâl

Nariman Celâl dey ki, «Bizim Balalar» erkânına siyasiy mabuslarnıñ aile azaları ve failler kire, olar sermiya toplaylar. Yani bu siyasiy degil de, hayriy birleşmedir.

Yardım pek kerekli, çünki bu ballar, em Qırımdaki, em de qıtaiy Ukrainadaki vatandaşlarnıñ destegini iss etmeli

– Zanımca, ukrain devleti qırımlı siyasiy mabuslarnıñ ailelerini daa faal surette desteklemeli. Ayrıca, Yuqarı Radada bu munasebetnen mahsus qanun qabul etilmeli, o endi (parlamentte – QA) qayd etilgen. Ukrainlilerni para bağışlamağa çağıram. «Bizim balalar» er ay er bir balağa 5-er biñ ruble ayıra, oktâbrniñ 11-nden soñ ise olranıñ sayısı, dörtten bir qısımğa artıp, yüz balanı teşkil etti. Bunıñ aqibetinde sermiyalar daa tez sarf etilecek. Yardım pek kerekli, çünki bu ballar, em Qırımdaki, em de qıtaiy Ukrainadaki vatandaşlarnıñ destegini iss etmeli. Hayriy sermiyanı teslim etmek içün ya men kibi faillerge muracaat etmege, ya da banktaki mahsus esapnen faylanmağa mümkün. «Bizim balalar» tarafından yapılğan faaliyet aqqında İnternetten ögrenmege mümkün.

(Matirialnıñ metin şeklini Vladislav Lentsev azırladı)

XS
SM
MD
LG