Oktâbrniñ 11-nde saba Bağçasarayda tutılğan altı qırımtatarı, rus silâlı hızmetlerinde Rusiyede yasaq etilgen «Hizb ut-Tahrir» teşkilâtınen bağlı olğanında şeklene. Bunı Qırım.Aqiqatqa tevqif etilgen Seyran Saliyevniñ advokatı Mammet Mambetov haber etti.
Advokat: «FSB binasında tevqif protokolı tizildi. (Rusiye Konstitutsiyasındaki – QA) 51-nci maddege esaslanıp, o (advokatnıñ müşterisi – QA) sorğundan keçmege razı olmadı. Şimdi o muvaqqat apishanege alıp ketile, yarın oña qarşı tedbir qararı qabul etilmek mümkün. O 205.5 maddesiniñ 2 qısımına binaen, yasaq etilgen «Hizb ut-Tahrir» teşkilâtınıñ azası olğanında şeklene», – dep, Saliyevniñ vaziyetini añlattı.
Tutılğan başqa adamlarğa da qarşı taqiqat tedbirleri ve sorğular keçirile, dep ayttı Mambetov.
Oktâbrniñ 11-nde, çarşenbe künü, Bağçasarayda rus silâlı hızmetleri bir-qaç qırımtatarınıñ, musulmannıñ evinde tintüv keçirgeni malüm oldı.
Rus haber vastaları, Rusiye Federal telükesizlik hızmetiniñ (FSB) matbuat hızmetine atıf etip, Qırımda silâlı hızmetler Rusiyede ve onıñ işğaline keçken Qırımda yasaq etilgen«Hizb ut-Tahrir» teşkilâtınıñ Bağçasaraydaki üceyresini yoq etkenlerini haber etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.
