Link açıqlığı

Saatnıñ esas haberi

Ukraina MİD-i: Qırımdaki tintüvler Rusiyeniñ repressiv siyaseti devam etkenini köstere


Ukraina Tışqı işler nazirligi (MİD) beyan etti ki, oktâbrniñ 11-nde Qırımda qırımtatarlarnıñ tevqif etilmesi nevbetteki kere Rusiye tarafından repressiv siyaset devam ettirilgenini köstere.

«İşğalciler, işğalci rejimge qarşı çıqqan qırımtatar faillerine ve ukrainlerge basqı yapqanları, nevbetteki kere Rusiyeniñ repressiv siyaseti devam etkenini köstere. Bu siyasetniñ maqsadı – Qırım yarımadasınıñ ealisini qorqutmaq ve er türlü uyğunsız fikirlerni yoq etmektir», – dep aytıla ukrain diplomatik müessisesiniñ beyanatında.

Bunen beraber, MİD temsilcileri dey ki, Qırımda musulmanlarnıñ evleri tintilgeni, diniy mensüplikke köre basqı yapılğanını köstermekte.

Kyiv, dünya cemaatına muracaat etip, Rusiyeni işğalge itiraz bildirgenlerniñ cezandıruvından vazgeçmege zorlamaq ve Qırım yarımadası sakinleriniñ aq ve üriyetini qorçalamaq içün areketke keçmege çağıra.

Oktâbrniñ 11-nde, çarşenbe künü, saba Bağçasarayda rus silâlı hızmetleri bir-qaç qırımtatarınıñ, musulmannıñ evinde tintüv keçirgeni malüm oldı.

Rus haber vastaları, Rusiye Federal telükesizlik hızmetiniñ (FSB) matbuat hızmetine atıf etip, Qırımda silâlı hızmetler Rusiyede ve onıñ işğaline oğrağan Qırımda yasaq etilgen«Hizb ut-Tahrir» teşkilâtınıñ Bağçasaraydaki üceyresini yoq etkenlerini haber etti.

Advokatlar, tevqif etilip, tintüvden soñ FSB-ge ketirilgen altı adam rus silâlı hızmetlerinde Rusiyede yasaq etilgen «Hizb ut-Tahrir» teşkilâtınen bağlı olğanında şeklengenlerini tasdiqladı.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.

«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.

XS
SM
MD
LG