Link açıqlığı

Çarşenbe künü, oktâbrniñ 11-nde, Bağçasarayda bir-qaç qırımtatarınıñ evinde rus silâlı hızmetleri tintüv ötkere. Bunı qırımtatar milliy areket faili Zair Smedlâyev haber etti.

«Bağçasarayda basqılarnıñ yañı dalğası başladı, Timur İbragimovnıñ, Marlen Asanovnıñ, Memet Belâlovnıñ, Seyran Saliyevniñ evlerinde tintüvler ötkerile», – dep yazdı Smedlâyev Facebookta.

O Bağçasarayda tintilgen bazı evleriniñ adreslerini qayd etti: Çepurin soqağında (Suleyman Asanov, «Salaçıq» qavehanesiniñ saibi), Mira soqağında fail Seyran Saliyevniñ evinde endi üçünci tintüv keçirile, Mira soqağında cemaat faaliyetçisi Timur İbragimovnıñ evinde ve Gordiyenko soqağında Server Zekeryayevte.

«Qırım birdemligi» birleşmesiniñ koordinatorı Dilâver Memetov Facebookta haber etti ki, Marlen Mustafayevniñ evi yanında Elnur Asanov (Marlenniñ ağası), Refat Asanov (Marlenniñ babası, o 62 yaşında) ve Ernest İbragimov, Eldar Asanov ve Redem Neciyev tutılğanlar.

Rusiye silâlı hızmetleri bu aqta resmiy izaat daa bermedi.

Qırım yarımadası Rusiye tarafından istilâ etilgen soñ, yarımadada FSB tarafından muntazam surette jurnalistler, failler, cemaatçılar tintile ve sorğuğa keçile. Uquq qorçalayıcılar bunı «uyğunsız fikirlerge qarşı kureş» kibi tanıy.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG