Link açıqlığı

Bağçasarayda tevqif etilgenlerniñ bazıları silâlı hızmetçiler tarafından pek köteklenilgen – advokat


Bağçaçasarayda oktâbrniñ 11-nde saba ötkerilgen tintüvler vaqıtında rus silâlı hızmetleri tarafından tutılğan sekiz fail arasında pek köteklenilgen soyları bar. Advokat Mammet Mambetovnıñ Qırım.Aqiqatqa bergen malümatına köre, olarnıñ episi politsiyada buluna.

«Olarnıñ arasında pek köteklenilgen kişiler bar, bizge bunı Bağçasaraynıñ ROVD binasında bulunğan adliyeciler bildirdi. Uquq qoruyıcı organlarınıñ hadimleri tarafından köteklev delilleri mevcut... Tintüv keçirilgen yerlerden birinde provokatsiya yapılğan edi. O yerde bir de birisi köteklemegendir, çünki o yerde çoq şaat bar edi, bese-belli, ketirgende urğandırlar. Bağçasarayda adamlar qulaqlarını tikken, ayaqqa turğan», – dedi advokat.

Mambetov, politsiya bölüklerinde tevqif protokolları tizilgenini bildirdi. Adliyeciler, faillerge memuriy cezalar berilmek mümkün olğanını da tüşüne.

Oktâbrniñ 11-nde, çarşenbe künü, saba Bağçasarayda rus silâlı hızmetleri bir-qaç qırımtatarınıñ, musulmannıñ evinde tintüv keçirgeni malüm oldı.

O yerde rus uquq qoruyıcıları, tintilgen evlerniñ yanına kelgen adamlarnı tutıp, eñ azından 8 kişini tevqif etken.

Rus haber vastaları, Rusiye Federal telükesizlik hızmetiniñ (FSB) matbuat hızmetine atıf etip, Qırımda silâlı hızmetler Rusiyede ve onıñ işğaline oğrağan Qırımda yasaq etilgen«Hizb ut-Tahrir» teşkilâtınıñ Bağçasaraydaki üceyresini yoq etkenlerini haber etti.

Advokatlar, tevqif etilip, tintüvden soñ FSB-ge ketirilgen altı adam rus silâlı hızmetlerinde Rusiyede yasaq etilgen «Hizb ut-Tahrir» teşkilâtınen bağlı olğanında şeklengenlerini tasdiqladı.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.

«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.

XS
SM
MD
LG