Link açıqlığı

İhtiyar ve Parkinson hastası olğan qırımtatarı politsiyağa qarşılıq köstergeninde qabaatlana – advokat


Server Karametov, arhivden alınğan fotoresim

Avgustnıñ 8-nde Aqmescitte, Ahtem Çiygozğa destek bildirmek maqsadınen keçirilgen yalıñız piket devamında tutılğan esli-başlı qırımtatar faili Server Karametovğa qarşı eki memuriy protokol tizilgen. Biri – «yalıñız piketlerniñ qaideleri bozulğanı» sebebinden, ekincisi – «politsiya hadimlerine qarşılıq kösterilgeni» içün. Bunı Qırım.Aqiqat muhbirine tutılğannıñ advokatı Emil Kurbedinov bildirdi.

Onıñ bergen malümatına köre, tutılğan Karametov Kremlniñ nezaretindeki Aqmescit Demiryol rayon mahkemesine ketirildi.

Erkekniñ alı fena: Parkinson hastası olğan 76 yaşındaki fail, tutılğanı sebebinden, mıtlaq içmesi kerek olğan ilâçnı alıp olamağan, titremesi küçlendi. Bunen beraber polis hadimlerinde onıñ sağlığına dair iç bir vesiqa yoq.

76 yaşındaki Server Karametov avgustnıñ 8-nde Kremlge tabi olğan Qırım Yuqarı makemesi yanında tutıldı. İhtiyar o yerge kelip, Qırımda mahkün etilgen qırımtatar milliy areketiniñ yetekçilerinden biri Ahtem Çiykozğa destek bildirmek içün, yalıñız piket başlatqan edi.

Kremlniñ nezaretindeki Qırım silâlı hızmetleri öz saytlarında Karametovnıñ tutılmasını izaatlamadı.

Server Karametov işğal etilgen Qırımda bundan evel de tutıla edi. Mayısnıñ 18-nde, qırımtatar halqı genotsidiniñ hatıra kününde o Aqmescitte, qırımtatar milliy bayrağını ve 1944 senesi sürgünlik qurbanları olğan ana-babasınıñ fotoresimlerini alıp çıqqan edi, ve o arada yaqalandı. Üç saat soñra, oña qarşı memuriy protokol tizilgen soñ, o yiberilgen edi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG