Link açıqlığı

Rusiye: Qırımnı elektriknen temenliginen bütün ağlar köçürildi


Rusiye tarafından istilâ etilgen Qırımnıñ energetik sistemasını teminlegen elektrik ağlarınıñ dörtü de şimdi köçürilgen, yük arttırılmaqta. Bunı Rusiyeniñ «FGC UES» energetik şirketiniñ matbuat hızmeti bildirdi.

«Krasnodar vilâyetinde 220 ve 500 kV ağlarında qazanı toqtatqan avtomatika çalıştı. Bundan sebep, qoşulğan ağlarda elektrik aqımı kesilgen. Acele avtomatika keregi kibi işledi. Qısqa tutaşuvlar olmadı, Qırımnı elektriknen teminlegen ağlarda çalışqan hadimler de hata yapmağan. Bütün ağlar endi köçürildi, yük arttırılmaqta», – dep ayttı şirketniñ temsilcisi.

Bunen beraber «FGC UES» şirketinde qayd etildi ki, qazağa qarşı avtomatikanıñ işlev algoritmleri ve qaideleri sistema operatorı tarafından tain etile eken.

«Soñ neticelerni umumiy taqiqat belgileycektir», – dep bildirildi.

Qırımdaki Rus akimiyetiniñ bildirüvlerine köre, şimdiki vaqıtta elektrik aqımı bütünley tüzetildi.

Qırımda Rusiyeniñ FVN idaresi dedi ki: Qırımda ışıq söngeni sebebinden vatandaşlarnıñ ayatı ve havfsızlığı içün telüke yoq.

Bundan evel, bütün Qırımda ışıqnıñ sönmesi avanıñ fevqulâde derecege qadar qızğanı sebebinen bağlı olğanı bildirilgen edi.

İşğal etilgen Qırım iyülniñ 28-nde bütünley ışıqsız qalğan. Bunıñ sebebi qomşu Rusiyeniñ Krasnodar vilâyetinde yüz bergen qaza eken. Elektrik aqımını ketirgen ağlarnıñ dörtü de qaza sebebinden kesilgen.

2015 senesi dekabr ayından başlap, Herson vilâyetinde elektrik direkleriniñ bozulmasından sebep, Qırımğa qıtaiy Ukrainadan elektrik aqımı toqtatıldı. Şimdiki vaqıtta Qırım özü çıqarğan energiya, Rusiyeden yarımadağa ketirilgen generator ve Rusiyeniñ Krasnodar vilâyetinden keçirilgen energo köpür ile elektriknen temin etile.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG