Qırımtatar Milliy Meclis reisi Refat Çubarovnıñ fikirine köre, Kremlniñ nezaretindeki Qırım akimiyeti qırımtatar bayrağını öz menfaatında qullana ve dünya cemaatına vade haberlerini yollamağa tırışa. Böyle fikirni Çubarov iyünniñ 26-nda Kyivniñ merkezinde Qırımtatar bayraq Künü munasebetinden ötkerilgen yürüş devamında Qırım.Aqiqatqa seslendirdi.
«Olar adamlarnı mahsus toplap, olarnıñ – işğalcilerniñ emirinde çalışqanlarğa Rus işğalci bayraqlarınıñ yanında qırımtatar bayrağını qullanmağa avale ete. Böyle etip, dünyaki teessuratnı – itaatsızlıq numayışını bölmege istey», – dedi Meclis reisi.
Onıñ sözlerine köre, bayraq – qırımtatar halqınıñ ayırılmaz parçasıdır ve o «işğalcilerğe qarşı itaatsızlıq» timsali oldı.
«Qırımtatar bayrağı bügün sadece qırımtatar halqı aqqında hatırlatmay, o işğalcilarge qarşı riayetkârsızlıqnı köstere, namus aqqında hatırlata. Bu sebepten bügün Qırımda, akimiyetten ruhset almayıp, qırımtatar bayraqlarınen bir de bir merasimler ötkerilse, adamlar bu timsal içün cezalana», – dedi Çubarov.
Kyivde Qırımtatar bayraq Künü munasebetinen bir sıra tedbir keçirildi. Radio Svoboda ile birlikte Qırım.Aqiqat adiseler olıp keçken yerlerden canlı yayın alıp bardı.
Qırımtatarları iyünniñ 26-nda Milliy bayraq Kününi qayd ete. Böyle bir kün olaraq, 1991 senesi iyünniñ 26-27 künlerinde Aqmescitte ötkerilgen ekinci Qırımtatar Milliy Qurultaynıñ birinci künü seçilgen edi.
Qırımtatar bayrağı – altın tamğalı kök bayraqtır.
Ukraina prezidenti Petro Poroşenko iyünniñ 26-da qırımtatar halqınıñ Milliy bayraq kününi tebrikledi ve «qırımtatar ve Ukraina bayraqları serbest Qırımda dalğalanacağından» emin olğanını bildirdi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
