Link açıqlığı

Gülnara Bekirova: «Qırım mıtlaq Ukrainanıñ erkânına qaytacaq»


Gülnara Bekirova

Soñki eki yıl devamında Herson vilâyetiniñ Geniçesk rayonında bir-çoq vatanperverlik tedbirleri keçirildi. Olarda qırımtatar cemiyeti de faal surette iştirak ete. Bu yerdeki cemiyet – Ukrainanıñ qıtaiy qısımında eñ büyüktir. Qırımtatar tiliniñ regiondaki tasil yurtlarında inkişaf etmesine de büyük diqqat ayırıla.

2014 senesiniñ soñunda Geniçesk rayon devlet memuriyetiniñ yolbaşçısı Aleksandr Vorobyöv, öz muavinleriniñ yerinden birini qırımtatarlarnı temsil etecek mutehassıs içün ayırdı. Bu yerge Qırımtatar Milliy Meclis azası Gülnara Bekirova keldi.

O Qırım.Aqiqatqa öz adiy iş kününiñ ketişatı ve areketiniñ maqsatları aqqında tarif etii, öz tarihiy vatanı – Qırım yarımadasınıñ kelecegi aqqında fikirlerinen paylaştı.

2016 senesi «Ukrainanıñ muvafaqiyetli qadını» leyhasında yer alğan Gülnara Bekirova dey ki: «Menim ayat şiarım – halqlarnıñ dostluğı. İsteyim ki, er kes dostluq ve barışıqta yaşasın, birlik olsun, çünki bunda – Ukrainanıñ küçü».

Devlet memuriyetniñ yolbaşçı muavininiñ iş künü

Ev zahmetlerini Gülnara hanım saba erteden baqıp başlay: saat beş, beş buçuqlarda – «işten evel pek çoq şey yapıp yetiştirmege kerek». Devlet işinde ve milliy temsil organlarında çalışmaqtan ğayrı, o yaqınlarına ve evine de vaqıt tapa. O sadece idareci degil de, bunen beraber evlât, ana ve refiqadır.

Endi 16 yıldan berli Bekirovlar ailesi Gülnara hanımnıñ ömür arqadaşı – Edem beyniñ hastalığınen küreşe. Evel o felçli edi, lâkin şimdi özü yüre bile.

«Kün sabası kuvars ve sarğılav prosedürlerinden başlana. Soñra – sabalıq. Sabalıq azırlağan arada, endi çamaşır yuvula, tez-tez olarnı asam. Yedige qadar er şeyni yetiştirem. Kün terkibime çoq iş kire – menim qapılarım er zaman er kes içün açıq, elimden kelgeni qadar yardım etmege tırışam. İş er daim çoq ola, lâkin altığa qadar yetiştirmege tırışam, çünki hastalarnı, dostlarımı ziyaret etmege, özüm de musafir qabul etmege isteyim. Aqşamlıqnı aqayımnen beraber azırlaymız. Kimerde musafirler kele, mıtlaq ATR-de haberlerni baqamız, subetleşemiz. Saat on ekige qadar ev işleri yapılmaq mümkün, ve kelecek künge plan tizile», – dep tarifley Gülnara Bekirova.

Er kün çoq iş ve vazifeler ola, lâkin boş vaqıtta o aş pişirmege, hususan milliy yemeklerni azırlamağa seve.

«İlk qarılğaçlar»

Umumen, Gülnara hanımnıñ ayat ikâyesi Geniçesktetki çoqusı semetdeşleriniñ ayat ikâyelerine beñzeydir: sürgünlikten avdet etkenleri vaqıtta, daa yetmişinci yılları Qırımğa qaytmağa tırışıp, çare tapamağanlarından soñ, qırımtatar aileleri Qırımğa qomşu olğan bu regionda yerleşe ediler.

1967 senesi Bekirovanıñ ailesi Özbekistandan Novoalekseyevka qasabasına köçtü. Balalıq çağından ve bu künge qadar Gülnara hanım mında yaşay. O vaqıt qasabağa tek bir-qaç qırımtatar qorantası köçken edi, onıñ içün olarğa kimerde «ilk qarılğaçlar» deyler.

«Menim ana-babam, bütün qırımtatarları kibi, Qırımdan sürgün etilgen ediler, – dey Gülnara Bekirova. – Menim anam Uralğa oğradı. Dayanılmaycaq şaraitlerde, 30-40 derece suvuqta, aranlarda, maişetsiz yaşadılar. Anam, aqşamları musafirlikke biri birine qatnağanlarını, Qırım aqqında, cenkten evelki vaqıtlar aqqında subetleşkenlerini, yırlağanlarını hatırlay edi. Qırım sevgisi ve acısı nesilden nesilge keçe edi... Qırımğa qaytıp kelgen soñ, eki buçuq ay dolaştıq, iş tapıp olamadıq – sadece qırımatatarı olğanımız içün işke almay ediler. 1967 senesi Novoalekseyevkağa kelip çıqtıq, o vaqıt mında beş aile bar edi, o qadarlıq. Qırımtatarları kim olğanını kimse bilmey edi».

Qırımnıñ azat etilmesi içün atılğan adımlar

Gülnara hanım dey ki, onı Qırım aqqında fikirlernen, vatanğa qaytmaq arzusınen terbiyelediler. Öz areketini o qırımlılarğa yardım etmek ve umumen Qırımnı işğalden azat etmek içün alıp bara.

Şimdi eñ müimi – Ukrainanı bütün ve bölünmegen devlet olaraq saqlamaqtır

«Menim içün şimdi eñ müimi – Ukrainanı bütün ve bölünmegen devlet olaraq saqlamaqtır. Onıñ terkibinde Qırım Muhtar Cumhuriyeti de, bütün şarqiy vilâyetler de olmaq kerek», – dey Gülnara Bekirova.

Geniçesk rayonında devlet memuriyet yolbaşçısınıñ muavini vazifesinde onıñ mesüliyetligine keñiş dairede çeşit meselelr ve büyük işler kirmekte. Bu sırada – içtimaiy daire, tasil meseleleri, medeniyet, ealiniñ içtimaiy qoruması, sağlıq, bala aqlarınıñ qorçalanuvı.

«Bizim rayonımız mürekkeptir, sıñırğa yaqın yerleşe: Ukrainanıñ Şarqından ve Qırımdan köçkenler bar, arbiy bölükler yerleşe, devlet sıñırı keçe, yazda – kurort mevsimi ola. Kün devamında meskennen, vesiqalarnen bağlı mesellerni baqmağa, Ukrainanıñ tasil vesiqalarını almağa istegen ballarğa, evlenüv aqqında ukrain şeadetnemelerini almağa istegen qırımlılarğa yardım etmege mecbur olam,ve böylece devam ete», – dey o.

Gülnara Bekirovanıñ fikirine köre, memuriy sıñırnıñ tam yanında insalar içün, kelip ukrain vesiqalarını azırlamaları, kerekli malümatlarnı almaları içün şaraiter yaratılmaq kerek.

«Bu bizim vatanperver insanlarımız da! Bügün Qırımda yaşap, Ukraina aqqında qonuşmağa qolay degil. Bu insanlar Qırımnıñ qaytacağına işanalar», – dep qayd ete Bekirova.

Qırımtatar Milliy Meclisinde o Herson vilâyetini temsil ete.

Öz tarihını, öz tilini, öz adet ve medeniyetini hatırlağan halq iç bir zaman ğayıp olmaq ve yoq olmaz

«Soñki eki yıl devamında qırımtatarlarnen bağlı merasimlerni yüksek seviyede keçirmege tırışamız. Bizim, Qırımtatar Milliy Meclisinen birlikte keçirgenimiz er bir merasimimiz – bu Qırımnıñ azat etilmesi içün atılğan daa bir adımdır. Qırımda olğan insanlar içün yapqanımız er şeyni – olrağa qaytmağa yardım etkenimizni añlasınlar dep yapamız», – dey Bekirova.

Qırım yarımadasınıñ kelecegini o Ukrainanıñ qalğan topraqlarından ayırılmayıp, birlikte keçirecegini köre:

«Qırım mıtlaq Ukrainanıñ erkânına qaytacaq, bunıñ başqa yolu yoq. Biz er saba ve er aqşam bir fikirnen turamız ve yatamız: qırımtatar milleti vatanına qaytsın. Eminim, öyle olacaq. Öz tarihını, öz tilini, öz adet ve medeniyetini hatırlağan halq iç bir zaman ğayıp olmaq ve yoq olmaz. Yañı nesilni vatanperverlik ruhında, vatan sevgisinen, öz halqına sevgi ile terbiyelegen ve dünyadaki diger halqlarnıñ vatanperverlik duyğularına ürmert ile davranğan halq ebediy yaşaycaqtır. Biz Qırımğa qaytacamız».

XS
SM
MD
LG