Kyivde 11 dekabrde, Halqara İnsan aqlarınıñ qoruvı Künü münasebetinen, hayriye aktsiyası keçirildi. Bütün toplanılğan paralar işğal etilgen Qırımda apiske oturtılğan siyasiy mabuslarnıñ ailelerine yollanılacaq, dep bildire Qırım.Aqiqat muhbiri.
Qırımtatar halqınıñ lideri, Ukraina millet vekili Mustafa Cemilev, bu aktsiya Qırımdaki insanlar içün pek müim olğanını qayd etti.
«Bu aktsiyanıñ esas maqsadı – maneviy destektir. İnsanlar, öz başına qalmağanlarını, halq olarnen beraber olğanını bilmek kereklerler», – dedi Cemilev.
Aktsiya çerçivesinde çeşit türlü master-klass dersleri ve qırımtatar yemek yarmalığı keçirildi.
Ukraina millet vekili Refat Çubarov qayd etti ki, Qırımdaki siyasiy mabuslarnıñ qorantalarında tahminen 70 bala – çağına yetmegen ballar.
Halqara İnsan aqlarınıñ qoruvı Künü er sene dekabr 10 künü qayd etile.
Qırım işğalinden soñ yarımadada mustaqil jurnalistler, qırımtatar faalleri ve Meclis azalarında tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
