Ukrain yayınları Qırımda kesilecek, çünki Rusiye qanunlarına uymay. Bunı dekabr 3 künü Kreml kontrolündeki Qırım İçki siyaset, haber ve bağ naziri Dmitriy Polonskiy beyan etti, dep bildire «RİA Novosti Krım».
«Bizim, Rusiye qanunı ile yasaq etilgen yayınlarnı Qırım cumhuriyetinde kestirmek içün, yeterli qadar tehnikiy çarelerimiz bar», – dedi Polonskiy.
Polonskiyniñ fikirine köre, Çonğar yanında yañı qulleniñ qurulması neticesinde «ancaq Herson vilâyetiniñ özünde ukrain programmalarınıñ daa istiqrarlı qabul etilmesi» qazanılmaq mümkün.
Qırım.Aqiqat evel yazğanı kibi, Ukrainanıñ TV ve radio yayınlav sualleri boyunca Milliy şurası Rusiyeniñ işğalinde bulunğan Qırımğa Çonğardan, DVB-T2 standartları boyunca, TV yayınlarını tarqatmaq içün kerekli dalğanı esaplamağa sımarladı. Bu aqta qarar Milliy şuranıñ toplaşuvında dekabr 1 künü qabul etildi.
Dekabr 2 künü Çonğarda TV ve radio qullesiniñ temeline birinci blok qoyuldı. Dekabrniñ soñunda Qırım sakinleri gece-kündüz devamında çalışacaq dört ukrain radiostantsiyasını eşitip olacaqları beklenile.
Ukraina TV ve radio yayınlav sualleri boyunca Milliy şurası Herson vilâyetinde televizyon ve radio yayınlarınıñ inkişaf ettirilmesi ve işğal etilgen Qırımğa yayınlarnıñ tarqatılması içün mahsus strategiya leyhasını azırladı. Strategiyanıñ maqsadı – Herson vilâyetiniñ daa çoq yerine analog ve dijital yayınlarnı yetkizmek, ve işğal etilgen topraqladan çıqqan efir yayınlarını Herson vilâyetiniñ cenübiy taraflarına yibermemektir.
