İşğal etilgen Qırımğa kelip, Rusiye haber vastalarında «Türkiye eyyeti» olaraq tanıtılğan taqımda Türkiye Cumhuriyetniñ resmiy akimiyet vekilleri yoq. Bunı Qırımtatar Milliy Meclis reisi Refat Çubarov, Tükriyeniñ Ukrainadaki elçihane işlerinde Vaqtınca vekâletli olğan Özgün Talunıñ malümatına atıf etip, Facebookta haber etti.
«Rusiye tarafından vaqtınca işğal etilgen Qırımnı, Ukraina qanunlarına riayet etmeyip, ziyaret etmege istegen Türkiye vatandaşlarına, Türkiyeniñ Moskvadaki elçisi tarafından bu kibi ziyaret qanunsız olğanı ve onıñ aqibetleri ola bilecegini evelden bildirilgenini de bilemiz», – dedi Çubarov.
O, şunı da qayd etti ki, Qırımdaki türk eyyetiniñ yetekçisi Hasan Cengizniñ beyanatları Türkiye Cumhuriyetiniñ Ukrainanıñ topraq bütünligine dair resmiy beyanatlarında tam ters kele.
«Rusiye mahsus hızmetleriniñ kontrolü astında azırlanılğan ve kerçekleştirilgen bu ziyaret çerçivesinde Türkiye vatandaşlarınıñ vaqıtınca işğal olunğan Qırımğa kelmelerini, Qırımtatar Milliy Meclisinde nevbetteki kere Rusiye Federatsiyası tarafından yapılğan, dünya toplulığını aldatmaq, ve ukrain ve türk halqları arasında işançsızlıq peyda etmek ıntıluvı olaraq tanıla», – dep qoştı Çubarov.
Qırımtatar Milliy Meclisi adından Refat Çubarov Ukraina telükesizlik hızmetini ve Ukraina baş prokuraturasını «vaqıtınca Rusiyeniñ işğalinde bulunğan Qırımğa, ukrain tarafınen uyğunlaşmayıp ve qanun qaidelerine riayet etmeyip, kelgen bütün ecnebiylerge qarşı cinaiy сeryan taqibini başlatmağa» çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
