İşğal etilgen Qırımğa Türkiye Cumhuriyetiniñ eyyeti kelip çıqtı. Erkânında deputatlar, siyasetçiler, ükümetten tış teşkilâtlarnıñ vekilleri ve iş adamları bar. Bunı «RİA Krım» haber ete.
Neşirniñ malümatına köre, Türkiye eyyetiniñ Moskva uçağı noyabr 23-de aqşam «Aqmescit» ava limanında qondı.
«Çetel eyyeti 20 temsilciden ibarettir. Yarımadağa Avrasya Kalkınma Platformunıñ yolbaşçısı, Türkiye havfsızlığı Baş müdirliginiñ reber muavininiñ itibarlı şahsı Hasan Cengiz, Türkiye prezidentiniñ vekili İbrahim Erilli, Ankara şeer yolbaşçısınıñ muavini Ahmet Tunç ve digerleri keldi», – dep qayd ete «RİA Krım».
Neşirniñ bildirgenine köre, eyyetniñ daa bir qaç azası, şu cümleden Türkiye Büyük Millet Meclisiniñ Adalet ve Kalkınma partisiniñ deputatı, Türkiye prezidenti Recep Tayiip Erdoğannıñ mesleatçısı ve eki doğmuş qardaşı Mehmet Mutlu ve Türkiye parlamentiniñ AKP deputatı Mahmut Malli kelecek.
«Üç künlik Qırım ziyareti çerçivesinde Türkiyeden kelgen musafirler yarımada akimiyeti ve iş adamlarınen, em de qırımtatar cemiyetiniñ liderlerinen körüşmege planlaştıra. Qırımnıñ yalı boyuna da ketilecektir», – dep bildire neşir.
