Link açıqlığı

BLOGLAR

Bazar 26 mart 2017

Calendar

Rusiye telekanallarında türlü-türlü şou körmege mümkün. Ötmek azlaşsa da, zevq çoqlaşa. Em de şou ne qadar zaif ve alçaq olsa, reytingi de o qadar yüksek çıqa.

Soñki misallerden birini alsaq – Rusiyeniñ Birinci telekanalında «Pust govorâr» («Söylesinler») yayınında iştirak etken 16 yaşındaki Diana Şurıginanıñ namusına toqunılğanı aqqında ikâyesi Rusiye internet fezasınıñ birinci mevzusı oldı. Yayından kesilgen parçalarnı millionlarnen seyir etildi. Elbette, Rusiye prezidenti memuriyetinden talilciler öz nenicelerini çıqaralar. Ve böylece bizler, yaqınlaşa turğan ve kelişken şahıslarnen keçecek prezidentlik kampaniyasınıñ şaatları olamız.

Vladimir Jırinovskiy bu şouda endi öz iştiragini başladı. Onıñ davalı beyanatları haber vastalarında tez-tez yayıla. Demek ki o, prezident saylâv kompaniyasında öz rolüni aldı, bu davacı ve şaqacınıñ rolü. Lâkin bu namzet yañı degil ve saylâvcı ondan endi bıqqandır, işte onıñ içün meydanğa yañı personaj çıqarıla.

Nazik, mülâyım, mencesine bir-az cail, mediada populâr – o kelecek Rusiye prezident saylâvları temaşasınıñ stsenariysine tam kelişe

Bese-belli, Rusiye prezidenti saylavlarında namzetlerden biri olaraq biz Natalya Poklonskayanı körecektirmiz. Rusiye siyasetinde yañı olğan şahıs, Putinniñ memuriyetine yardımcı olıp, bıqtırğan eski namzetlerniñ arasına kirip bir-az tazelik ketirmek mümkün. Nazik, mülâyım, mencesine bir-az cail, mediada populâr – o kelecek Rusiye prezident saylâvları temaşasınıñ stsenariysine tam kelişe.

Temaşa ise pek kerek, aksi alda saylâvcılar kelmez, bu ise olğan rejimge iç te kerekmey. Bu yerde Poklonskaya, öz rolini oynap, kampaniyağa meraq doğurtmaq kerek.

Zanımca, Natalyadan daa bir çoq şaşırtıcı areketler körecektirmiz. Eali ise bunı meraq ete, ve Putinniñ memuriyetinde oturıp qoqla oynatqlarğa da tamam bu kerek

Soñki zamanları Devlet Dumasınıñ deputatı vazifesinde bulunğan Natalya Poklonskaya o qadar şaşırtıcı sözler ayta ki, haberlerde ep onı añalar. Rusiyeniñ merkeziy telekanalında II Nikolay abidesi şıfalı olğanı aqqında onıñ sözleri, neiçündir, preident namzeti olaraq çıqaracağına ketirecek stenariyge pek uya. Belki de, bu stsenariy evelden azır. Em ciddiy bir namzet degil de, şamatalı, bir az şaşmalağan qadın rolü ayırılğan. Onıñ içün, zanımca, Natalyadan daa bir çoq şaşırtıcı areketler körecektirmiz. Eali ise bunı meraq ete, ve Putinniñ memuriyetinde oturıp qoqla oynatqlarğa da tamam bu kerek.

Külmege de mümkündir, amma neticede Poklonskaya bayağı rey qazanacağını eminliknen tahmin ete bilemiz. Bazıları külmek içün oña rey berecek, bazıları eski sımalardan bezgenleri içün, birleri ise onı qadın olaraq (belki atta siyasetçi olaraq) begenip, rey berecektir. Aytacağım, Natalya Vladimirovna, Rusiye siyasetindeki bazı dinozavrlarını artta qaldırsa, taaciplenmem.

Vladimir Vladimiroviç ise bu temaşanıñ iştirakçileri aldında parıldacaq ve aqılından «show must go on» keçirip, qısqıldap külecek…

Zarema Seitablayeva, qırımlı, bloger (müellifniñ adı ve soyadı telükesizlik maqsadı ile deñiştirildi)

«Bloglar» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışları ile aynı olmaması mümkün

Örnek resim

Örnek resim

Zarema Seitablayeva – yarımadadaki köy mektepleriniñ «optimizatsiyası» aqqında

2014 senesi mayıs ayında yolda tanış bir ocağa rastkeldim. Yüzü Qırımnıñ mayısı küneşi kibi parılday edi. «Tüşüne bilesiñmi, bu ay 18 biñ ruble aylıq aldım», – dep ayttı o maqa. O vaqıt kerçekten bayağı para edi, fiyatlar Qırımda ukrain olıp qala edi. Uzun-uzun laf ettik, tanışım quvançını toqtamayıp añlattı, Rusiyede ocalar kerek ve ürmet etile, endi iqtisat etmeycegini ayta edi ve ilâhre...

Aman-aman üç yıl keçti. Bu afta kene bu tanışıma rastkeldim. Selâmlaştıq, eski tanışlar yapqanı kibi, biri-birimizden işler nasıl ketkenini soramağa başladıq. Ocanıñ beti bu sefer pek parlaq degil edi, aksine qasevet etkenini köstere edi. Aytalar da, er kes öz dertini añlata — o da işini añlatmağa başladı. Haberleri ise iç de quvançlı olmadı.

Dostum Qırımda mektep tasiliniñ «optimizatsiyası» başlağanını añlattı. Qırım ocalarını işten boşatmağa başlaycaqlar

Dostum Qırımda mektep tasiliniñ «optimizatsiyası» başlağanını añlattı. Qırım ocalarını işten boşatmağa başlaycaqlar. «Optimizatsiya» endi başladı, yaznı da beklemeyler. Köy mektepleri eñ çoq tesirlenir. Yüzden az talebesi olğan doquz sınıflı kiçik mektepler qapatılacaq. Kiçik orta mektepler ise doquz sınıflı olacaq. Ocalarnıñ sayısı yüz talebege bir oca olaraq belgilenecektir.

Köy mekteplerinde ocalar «çoq zenaatlı» olacaq. Biologiya ocası himiya, fizik, coğrafiya derslerini berecek. Talebelerniñ bilgileri nasıl olacaq? Kerekli bir seviyede degildir. Yahşı talebeler şeer mekteplerine keçecek, böylece köy mektepleri «optimizatsiyağa» oğraycaq, köyler ise yoq olmağa devam etecek.

Tanışım dey ki, ocalar bu haberlerge şaşa, çoqusı inanıp olamay, amma bu malümat mekteplerde keçirilgen resmiy toplaşuvlarda seslendirildi. Qırımnıñ köy rayonları eki yüzer ocanı işten boşatmalı. Yarısı nefaqacı olsa bile, er bir rayonda işsiz olğan yüz oca – cemiyet içün ağır olacaq.

Yolbaşçılıq «optimizatsiyanıñ» sebebi para az olğanınen bağlı, dep bildire

Dostumnıñ añlatqanına köre, yolbaşçılıq «optimizatsiyanıñ» sebebi para az olğanınen bağlı, dep bildre. Ocalarnıñ sayısı eksilse ve ders saati artsa, akimiyet eki maqsatqa irişip olur – tatil, tedaviylev, hastahane kibi içtimaiy ödemeler ve ilâhre eksilir ve ders saati çoqlaşqan soñ ocalarnıñ aylığı da artar.

Aksenov ve Medvedev işsizlik yeñilgenini ne qadar aytsa da, vaziyet pek kederli

Amma işsiz qalğanlar ne yapacaq? Aksenov ve Medvedev işsizlik yeñilgenini ne qadar aytsa da, vaziyet pek kederli. İşten boşatılğan ocağa işke kirmek pek zor olacaq. Subet soñunda tanışımdan sorayım, üç yıl evelsi pek bahtlı ediñ de. O, açuvlanıp ayta: ebet, bizler de turizmni icret ile qarıştırğan lâtife kibi oldıq.

Öyle, işte.

Tanış ocanen körüşken soñ şeer memuriyetine kirdim, odalar tolu, memurlar rıqma-rıq. Oturıp saatke baqalar, üyle teneffüsini bekleyler. Aytacaq edim, Aksenov ve Medvedev efendiler, yañlış insanlarnı işten boşatasıñız. Lâkin olarğa adiy insanlarnıñ fikirleri kerekmi...

Zarema Seitablayeva, qırımlı, bloger (müellifniñ adı ve soyadı telükesizlik maqsadı ile deñiştirildi)

«Bloglar» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışları ile aynı olmaması mümkün

Daa yüklemek

XS
SM
MD
LG