Lilâ Aliyeva – Qırımda qaçırılğan Dünya Qırımtatar Kongresiniñ icra komitet azası Ervin İbragimovnıñ anası mektüp yazıp, Ukraina prezidenti Petro Poroşenkoğa muracaat etti.
Öz mektübinde Aliyeva Poroşenkonı daa çoq ğayret ile onıñ oğlı Ervin İbragimovnı ve diger ğayıp olğan qırımtatarlarnı qıdırmağa ve azat etmege rica ete.
Mektüpniñ fotoresimlerini Facebook saifesinde «Crimea-SOS» cemaat teşebbüs taqımınıñ reisi Tamila Taşeva yerleştirdi.
«Sayğılı Devlet Yolbaşısı! Büyük telâş duyğusı ile Sizge oğlumnıñ ve diger qaçırılğanlarnıñ taqdiri içün muracaatta bulunam, ve olarnıñ tapılması ve azat etilmesi içün daa çoq ğayret berilecegine ümüt etem. Biz, qaçırılğan qırımtatarlarnıñ ana-babaları, eminmiz ki, olarnıñ qabaatı – Ukrainanı ateşin sevgenleri ve kerçek vatanperverler olğanından ibaret. Sayğılı Petro Oleksiyovıç! Ümüt etem, Siz kederden cansız qalğan ananıñ, invalidniñ, er saba uyanıp candan sevgen elâdını körmege ve qucaqlamağa ümüt etken qadınnıñ muracaatına lâqayd qalmazsıñız», – dep yaza Lilâ Aliyeva Poroşenkoğa yollağan mektübinde.
Ervin İbragimovnıñ hırsızlanması aqqında 2016 senesi mayıs 24-te haber peyda oldı. Rusiye Taqiqat komitetiniñ Qırım idaresi ğayıp olğan Qırım sakinini qıdırmağa başlağanını bildirgen edi. Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.
Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».
Qırımtatar Milliy Meclis reisiniñ birinci muavini Nariman Celâl Qırımnıñ Rusiyege qoşulğanından soñ yarımadada onbeşke yaqın insan ğayıp olğanı aqqında beyan etti. Qırımtatar halqınıñ milliy lideri Mustafa Cemilev ğayıp olğan 20 vetandaşı aqqında haber etken edi. Qırım Muhtar Cumhuriyetiniñ savcılığı elde etilgen malümat boyunca 30 iş alıp barılmaqta.
Rusiyege boysunğan Qırım prokurorı Natalya Poklonskaya qayd ete ki, yarımadada 357 insannıñ bulunma yeri belgilenmegen, olardan 188 kişi belgisiz ğayıp oldı ve 169 adamnıñ soy-soplarınen bağı üzüldi. Qayd etilgen raqamdan 26 insan – qırımtatardır.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
