Büyük Britaniya işğal etilgen Qırımda keçirilgen Rusiye Devlet Dumasına saylavlarnıñ neticelerini tanımadı. Bu aqta britaniyalı Tışqı işler nazirliginiñ beyanatında bildirile.
«Birleşken qırallıq Qırımda Devlet Dumasına saylavlarnıñ qanuniy olğanını tanımay. 2014 senesi Qırımnıñ Rusiye tarafından işğal etilmesi qanunsız edi ve şimdi de böyle qalmaqta», – dep aytıla beyanatta.
Bunen beraber, Büyük Britaniya tışqı müessisesinde OSCE-niñ rusiyeli Devlet Dumasına saylavlar boyunca maruzasına qol tuttılar, ve qayd ettiler ki, rey berüv devamında bir sıra bozuvlar oldı.
Rusiye Devlet Dumasına saylavlar sentâbr 18-de keçirildi. Bir sıra devletler, bu cümleden, AQŞ, Kanada, Frenkistan, İsveçiya işğal etilgen Qırım territoriyasında saylavlarnıñ qanuniy olğanını tanımağa red etti.
Poloniya Tışqı işler nazirligi Rusiye Devlet Dumasına bütün parlament saylavlarınıñ qanuniy olğanını şübeli saydı.
