Qırımnıñ Curçı rayonındaki Toqulçaq (Grişino) köyünde yerli meclis reisi Enver Alâdinovda Rusiyege boysunğan politsiya hadimleri tintüv keçirdi. Bu aqta Facebok saifesinde Qırımtatar Milliy Meclisi reisiniñ birinci muavini Nariman Celâl bildirdi.
Bundan soñ Celâl yañartılğan malümatnı bildirip, Alâdinovnıñ özünde tintüv yekünlengeni, uquq qoruyıcılar ise, yerli meclis reisiniñ babasında tintüv keçirmege ketkenini ayttı.
Nariman Celâl uquq qoruyıcılarnıñ areketlerini Enver Alâdinovnıñ cemaat faaliyetinen añlata.
Rusiyege boysunğan uquq qoruyıcı organlarınıñ saytlarında tintüvler aqqına malümat şimdilik bildirilmey.
Diger menbalardan bu malümatnıñ tasdıqlanması yoq.
Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler çoqlaştı, adamlar diniy sebeplerden taqip etile, dep qayd eteler Meclis temsilcileri ve uquq qoruyıcılar. Amma yarımadanıñ rusiyeli akimiyeti ve Kreml bunı red ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
