Link açıqlığı

Qırımda mahkeme «Hizb ut-Tahrir» işi boyunca qabaatlanğan daa bir kişi – Alimovnıñ apiste bulunma müddetini dekabr ayına qadar uzattırdı – adliyeci


Refat Alimov

Avgust 6-da Rusiyege boysunğan Aqmescitteki Kiyev rayon mahkemesi «Hizb ut-Tahrir» işi boyunca qabaatlanğan daa bir kişi – Yalta sakini Refat Alimovnıñ apiste bulunma müddetini dekabr ayına qadar uzattırmaq qararını aldı. Bu aqta Qırım.Aqiqatqa Qırım adliyecisi Emil Kurbedinov bildirdi, o bugün yaltalı Vadim Siruknıñ apiste bulunma müddetiniñ uzattırılması boyunca toplaşuvda buluna edi.

«Bilgenime köre, onıñ da apiste bulunma müddeti dekabr ayına qadar devam ettirildi. Uzattırdılar, illâ ki, taqiqatçınıñ şefaatını qanaatlendirdiler. Bellesem, aynı (Vadim Siruknıñ kibi – QA) – dekabr 8-ge qadar», – dep qayd etti Kurbedinov.

Sentâbr 6-da Aqmescitteki Kiyev rayon mahkemesi «Hizb ut-Tahrir» işi boyunca yaqalanğan yaltalı Vadim Siruknıñ apiste bulunma müddetini dekabr 8-ge qadar devam ettirmek qararını aldı. Siruknıñ soy-sopları bu qararnı Rusiyege boysunğan Qırım Yuqarı mahkemesine şikâyet arizasını bermege niyetlene.

Aqmescitteki Kiyev rayon mahkemesi bu iş boyunca qabaatlanğan uquq qoruyıcı Emir-Usein Kuku, Muslim Aliyev ve Arsen Cepparovnıñ apiste bulunma müddetini dekabr 8-ge qadar devam ettirdi.

Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Refat Alimov 2016 senesi aprel ayında rusiyeli uquq qoruyıcılar tarafından aynı «Hizb ut-Tahrir» ile bağlı olğanında şeklenilip, yaqalandı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG