Link açıqlığı

Saatnıñ esas haberi

«Hizb ut-Tahrir» işi boyunca qabaatlanğannıñ qorantası onıñ apiste bulunması müddetiniñ uzattırılmasına qarşı şikâyet etecek


Vadim Siruk
Vadim Siruk

İşğal etilgen Qırım ükümeti tarafından «Hizb ut-Tahrir» ile bağlı olğanında qabaatlanğan Yalta sakini Vadim Siruknıñ yaqınları onıñ apiste bulunması müddetiniñ uzattırılmasına qarşı yuqarı turğan mahkemege şikâyet arizasını bermege niyetlene.

Sentâbr 6-da Aqmescitteki Kiyev rayon mahkemesi «Hizb ut-Tahrir» işi boyunca yaqalanğan yaltalı Vadim Siruknıñ apiste bulunma müddetini dekabr 8-ge qadar devam ettirmek qararını aldı. Soy-sop böyle qararnıñ delilsiz olğanını saya ve Rusiyege boysunğan Qırım Yuqarı mahkemesine şikâyet arizasını bermege niyetlene. Bu aqta Qırım.Aqiqatqa qabaatlanğannıñ apayı Anna Bogaçeva bildirdi.

«Vadim Siruknıñ apiste bulunma müddeti dekabr 8-ge qadar uzattırıldı, imayeniñ delilleri eşitilmedi, qabaatlayıcı taraf qararnı cinayetniñ ağır olğanınen añlata, işte, yañı bir şey yoq. Şarait boyunca: qabaatlanğan kişi mahkeme vaqtında qafeste oturğanı, bu insannıñ ar-namusını aşalağanı boyunca, ve SİZO-da şarait boyunca bizge ayttılar ki, davanı vatandaş mahkemesinde baqmaq kerek. Yani, bu cinaiy mahkemede degil de, şefaat tertibinde degil de, ayrı bir mahkemede. Böyle sözler bugün toplaşuvda aytıldı», – dep ayttı Siruknıñ apayı.

Tünevin Aqmescitteki Kiyev rayon mahkemesi bu iş boyunca qabaatlanğan uquq qoruyıcı Emir-Usein Kuku, Muslim Aliyev ve Arsen Cepparovnıñ apiste bulunma müddetini dekabr 8-ge qadar devam ettirdi.

Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Refat Alimov 2016 senesi aprel ayında rusiyeli uquq qoruyıcılar tarafından aynı «Hizb ut-Tahrir» ile bağlı olğanında şeklenilip, yaqalandı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG