Link açıqlığı

Yuqarı Radada diger devletlerni Rusiyeden Qırımda Umerovnı azat etmege talap etmege çağıralar


İlmi Umerov

Ukraina Yuqarı Radasınıñ Tışqı işler komiteti demokratik devletlerniñ tışqı işler komitetlerine ve dünya halqara teşkilâtlarına Rusiye Federatsiyasından Qırım psihiatrik hastahanesinde mecburen bulunğan Qırımtatar Milliy Meclisi reisniñ muavini İlmi Umerovnı, siyasiy dissidentniñ ayatını saqlamaq içün, azat etmesini acele talap etmek muracaat etti.

Muracaat Ukraina Yuqarı Radasınıñ saytında derc etildi.

«Umerov efendiniñ alı soñki künler kritiktir, ve onıñ qızı bildirdi ki, babası er angi vaqıt öle bile. İlmi Umerovğa qarşı repressiv psihiatriyanıñ qullanılması Qıynavlar ve insaniyetsiz ya da namusına toqunğan davranmanıñ ya da cezalamanıñ ögüni aluv boyunca Avropa Konventsiyasına zıt kele», – dep aytıla beyanatta.

Vesiqada hatırlatalar ki, televizyonda bergen intervyu içün İlmi Umerov 5 yılğa apiske qapatıla bile.

Ukraina Yuqarı Radasınıñ Tışqı işler komiteti Kremlniñ böyle areketlerine «Rusiyeniñ repressiya psihiatriyasına qaytması, dissidentlerniñ siyasiy taraftan mahküm etilmesi, esas insan aqlarınıñ bozulması ve sovet timsalleri telükeli teşviqatı işareti» olaraq qıymet kese.

Komitette demokratik devletlerniñ bütün siyasiy mabuslarnı azat etmek maqsadınen rusiyeli yolbaşçılarına daimiy diplomatik basımına ümüt besleyler.

Rusiyeli FSB bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.

Sağlıq alına baqmadan, Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı. Psihiatrik hastahanede İlmi Umerovnıñ sağlıq alı yaramaylaştı.

Human Rights Watch Halqara uquq qoruyıcı teşkilâtı rusiyeli ükümetten Qırımtatar Milliy Meclisi reisiniñ muavini İlmi Umerovnıñ, onıñ sağlıq alı munasebetinen kerekli tedaviylenüvden keçmesi kerek olğanı içün, Aqmescit psihiatrik hastahanesinden deral azat etilmesini talap etti.

İlmi Umerovğa destek aktsiyaları Ukrainada ve bir sıra avropalı devlette keçirile.

XS
SM
MD
LG