Link açıqlığı

Qırımda psihiatrik hastahanede tutulğan Qırımtatar Milliy Meclisi reisiniñ muavini İlmi Umerovğa destek aktsiyaları avgust 26-da tek Ukrainada degil de, Avropada da keçirilecek. Bu aqta Qırım SOS cemaat teşebbüsi bildire.

«Brüsseldeki «De l'Aviation» meydanında «İnsan aqları boyunca halqara partnerlik» uquq qoruyıcı teşkilâtınıñ temsilcileri diger faallernen beraber Meclis reisniñ muavini İlmi Umerovğa destek aktsiyasını keçirecek. Bu aqta QirimInfo agentligine «İAHP» temsilcileri bildirdi. Aynı böyle aktsiya yarın (avgust 26-da – QA) saat 18:00-de Varşavadaki Rusiye Federatsiyası elçiligi yanında keçirilecek. Aktsiyanı Varşavadaki qırımtatar faalleri teşkil ete», – dep bildirdi uquq qoruyıcılar.

Ukrainada aktsiya Mustaqillik Meydanında keçirilecek.

Rusiyeli FSB bu sene mayıs ayında İlmi Umerovğa qarşı «separatizm» maddesi boyunca cinaiy iş açtı. Kremlge boysunğan Qırım prokurorı Natalya Poklonskaya ayttı ki, o, ukrain ATR telekanalınıñ yayınında Rusiye topraq bütünligini bozuvına çağırğan edi.

Sağlıq alına baqmadan, Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı. Psihiatrik hastahanede İlmi Umerovnıñ sağlıq alı yaramaylaştı.

Human Rights Watch Halqara uquq qoruyıcı teşkilâtı rusiyeli ükümetten Qırımtatar Milliy Meclisi reisiniñ muavini İlmi Umerovnıñ, onıñ sağlıq alı munasebetinen kerekli tedaviylenüvden keçmesi kerek olğanı içün, Aqmescit psihiatrik hastahanesinden deral azat etilmesini talap etti.

XS
SM
MD
LG