İyül soñunda Aqyarnıñ eñ büyük «Lider» supermarketler ağı şeker fiyatını bir kilogramm içün 55-ten 57 rublege qadar, yani aman-aman 2%-ğa, köterdi. Bu aqta Qırım.Aqiqatqa supermarket hadimleri bildirdi.
Aynı vaqıtta bazı şahsiy aşayt tükânlarında şeker fiyatı bir kilogramm içün 65-ten 70 rublege qadar, yani 7%-den ziyade, köterildi, dep bildire Qırım.Aqiqat mühbiri. Tükânlarda fiyatlarnıñ köterilmesini, temin eticiler kötere fiyatlarını kötergenlerinen bağlay.
2015 senesi iyün ayına köre (soñki 13 ay içinde) «Lider» supermarketler ağında şeker fiyatı bir kilogramm içün 34-ten 57 rublege qadar, yani 67%-ğa, köterildi.
Supermarkette şeker fiyatınıñ böyle köterilmesini bu mahsulatnıñ Ukrainadan ketirilmesi toqtatılğanınen bağlaylar.
Ukraina Nazirler kabinetiniñ Qırım ile memuriy sıñırdan mal ve hızmetlerniñ keçirilmesi aqqında № 1035 qararı 2016 senesi yanvar ortasında amelge keçti. Qararda aşayt mallarına ve diger şahsiy şeylerge sıñırlav kirsetile. Vesiqağa köre, Ukraina Gümrük qanunnamesiniñ 370-nci maddesinde qayd etilgen şeylerni keçirmek mümkün. Cedvelge 23 serleva kire (urba, tehnika ve ilâhre).
Yuqarı Radada iyül 19-da vaqtınca işğal etilgen territoriya aqqında qanun leyhası qayd etildi, qaysı biri, hususan, «Qırım» serbest iqtisadiy zonası aqqında qanunnı lâğu etmege teklif ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
