Link açıqlığı

Qırımda mahkeme yaqalanğan uquq qoruyıcınıñ taqiqatçığa qarşı şikâyetini baqıp çıqacaq – adliyeci


Emir-Usein Kuku

Rusiyege boysunğan Aqmescitteki Kiyev rayon mahkemesi iyül 28-de «Hizb ut-Tahrir» işi boyunca qabaatlanğan, İnsan aqları boyunca kontakt gruppasınıñ azası, Yalta sakini Emir-Usein Kukunıñ eki şikâyet arizasını baqıp çıqacaq. Bu aqta Qırım.Aqiqatqa izaat berip, yaqalanğan uquq qoruyıcınıñ adliyecisi Aleksandr Popkov bildirdi.

«İyül 28-de saat 15:00-te Emir-Usein Kukunıñ eki şikâyet arizası baqılacaq, olar aynıdır. O, taqiqatçılar bizge ekspertizalarnıñ tayinlenmesi aqqında qararnıñ nushasını yapmaq imkânını bermegenleri ve bizge bu qoşma malümatnı taqdim etmegeneri aqqında şikâyet arizalarını berdi», – dep añlattı Popkov.

Onıñ sözlerine binaen, taqiqatçılarnıñ böyle areketlerinden onıñ imaye etken kişiniñ aqları bozuldı.

«Biz aqlarımıznı qullanıp olamaymız, ekspertke qoşma suallerimizni berip olamaymız, çünki eksteprtlerge nasıl malümat taqdim etilgenini bilmeymiz», – dep ayttı adliyeci.

Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG