Qırımda Elmira Ablâlimova, şimdiki vaqıtta Aqmescitte apiste bulunğan Qırımtatar Milliy Meclisi reisiniñ muavini Ahtem Çiygoznıñ apayı, şahsiy havfsızlığı telüke astında bulunğanını ayttı.
Bu aqta Elmira Ablâlimova iyün 17-de, cuma künü, Facebook saifesinde bildirdi.
Onıñ sözlerine köre, iyün 16-da gece, saat 22:40-ta belli olmağan şahıslar onıñ azbarına kirdi.
«Qomşular yanında keçip, adamlarnı ve avtomobilni körip, şamata kötergenleri sayesinde, belli olmağan şahıslar pek tez ğayıp oldı. Qırımda adamlarnı hırsızlağanlarını, yaqında qıznıñ namusına keçip onı öldürgenini köz ögüne alsaq, bellesem, menim ayatım telüke astında buluna. Uquq qoruyıcılarnıñ bunı yapa bilecegine kefaleti yoq. Özümni qorçalamaq içün neler yapacağımnı bilmeyim», – dep qayd etti Elmira Ablâlimova.
Qadınnıñ qayd etkenine köre, o, rusiyeli Taqiqat komitetine ve FSB-ge mütenasip arizanı azırlamağa niyetlene.
Elmira Ablalimovanıñ aqayı Ahtem Çiygoz 2015 senesi yanvar 29-dan başlap Aqmescitte apiste buluna. Aprel 29-da onıñ apiste bulunma müddeti iyül 22-ge qadar uzattırıldı.
Rusiyege boysunğan Qırım Yuqarı mahkemesi mayıs 13-te «fevral 26 işi» boyunca qabaatlanğan Ahtem Çiygoz ve Ali Asanovnıñ apiste bulunma müddetiniñ uzattırılması boyunca imayeniñ şikâyet arizasını red etti.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksönov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
2016 senesi mayıs 17-de Qırım Muhtar Cumhuriyeti prokuraturası 2014 senesi fevral 26-da Qırım parlamenti yanında barışıq toplaşuvınıñ keçirilmesine mania olması boyunca cinaiy iş açtı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
