Link açıqlığı

Qırımda yaqalanğan musulmanlar apiste oraza tuta – yaqalanğanlarnıñ soy-sopları


İllüstratsiya fotoresimi

«Hizb ut-Tahrir» ile bağ tutqanında qabaatlanıp Qırımda yaqalanğan musulmanlar, apiste bulunğanına baqmadan, Ramazan ayı başlamasınen oraza tuta. Bu aqta Qırım.Aqiqatqa yaqalanğan kişilerniñ soy-sopları ayttı, bundan da ğayrı, olar tünevin keçirilgen mahkeme toplaşuvı aqqında tafsilâtlı malümat bildirdiler, bu toplaşuvda Qırım musulmanlarınıñ apiste bulunma müddetini sentâbr ayına qadar uzattırdılar.

Soy-soplarınıñ malümatına köre, «Qırım birdemligi» soy-sop birleşmesiniñ iştirakçilerinden tek bazılarnıñ mahkeme zalında bulunmağa imkânı oldı.

«Toplaşuvlar pek uzun oldı, zalnıñ avası tınçıq edi, er kes sığıp olamadı. Emir-Usein Kuku işi boyunca toplaşuvğa onıñ anası bile başta kirip olamadı, çünki birinci nevbette kirmedi, soñra oña, zalda başqa yer yoq, dep aytıldı. Toplaşuv başlanğan soñ, onı zalğa yiberdiler. Bunen beraber, zalnıñ yarısı praktikantlar oldı», – dep añlattı Qırım.Aqiqatqa birleşme iştirakçisi Anna Bogaçeva.

«Din boyunca ağalarımıznıñ metanetini qayd etmege isteyim. Apiste deşetli şaraitke, evel alına bilecek mahkeme qararlarına baqmadan, şimdi Ramazan ayı olğanına baqmadan, ve olar musulman olıp oraza tuta, mahkeme ögünde sözde buluna, öz noqta-i nazarına deliller ketire, ve iç te teslim olmay ve ruhtan tüşmeyler», – dep ayttı Anna Bogaçeva.

Aqmescitte Kremlge boysunğan Kiyev rayon mahkemesi 2016 senesi fevral ayında yaqalanğan, «Hizb ut-Tahrir» işi» boyunca dört qabaatlanğan kişiniñ – Emir-Usein Kuku, Vadim Siruk, Enver Bekirov ve Muslim Aliyevniñ apiste bulunma müddetini üç ayğa uzattırdı.

Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı.

«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG