Qırımda musulmanlar içün muqaddes olğan Ramazan ayına bağışlanğan merasimler keçirile. Eski Qırım, Canköy, Curçı ve Qurman rayonlarında «Hoş keldiñ, mubarek Ramazan!» bala merasimleri endi keçirildi, dep bildire Qırım Müftiyatı Facebook saifesinde.
«Bu ay yüreklerniñ yaqınlaşması vaqtı olsun, bizge merametli olmağa ve bir birimizge destek köstermege yardım etsin. Bütün yapqan hayırlı işlerimizni Allah qabul etsin. Amin», – dep bildire Qırım ve Sevastopol musulmanları diniy idaresiniñ matbuat hızmeti Qırım müftisiniñ muavini Ayder İsmailovnıñ sözlerini.
Matbuat hızmetiniñ malümatına köre, Ramazan ayı devamında rayon camilerinde çeşit mevzularğa, şu cümleden «zekât» ve «cenaze» mevzularına bağışlanğan lektsiya ve seminarlar keçirilecek. Regional camilerde Ramazan devamında İslâm dini temelleri ve Quran oquvı kursları çalışacaq.
Qırım müftisi din erbaplarını keleyatqan Ramazan ayınen hayırladı, ve bu orazada «Allahtan qorqqan, tek başqalar ögünde namuslı olğan degil de, öz vicdanı ögünde namuslı olğan kişi» olmağa tiledi.
Muqaddes Ramazan ayı devamında musulmanlar oraza tuta, yani yarıq kün devamında aş-suvdan vazgeçe. Ağırayaqlı ve bala emizdirgen qadınlar, yedi yaştan kiçik balalar, hasta ve qart adamlar, yolcular içün oraza tutması farz degil.
