Link açıqlığı

Rusiye Federatsiyasınıñ Yuqarı mahkemesi Oleg Sentsov ve Aleksandr Kolçenkonıñ ükmüne dair kassatsion şikâyetlerini baqmaqtan vazgeçti. Böylece olarnıñ işi tekrar baqılıp, mahkemeniñ sert bir qararı yañıdan çıqarılacaq kibi ümütler yoq oldı. Qırımlılarnıñ adliyecisi bildire ki, Kyiv ve Moskva Oleg ve Aleksandrnıñ Ukrainağa berilmesi mevzusında añlaşıp olacaqlarına ümüt etile.

Rusiye Yuqarı mahkemesinden Oleg Sentsov ve Aleksandr Kolçenkoğa red cevabı kelgenini iyün 2-de aydınlattılar. Bu haberni mahkemeniñ matbuat hızmeti bildirdi.

«Kassatsion mahkemesi toplaşuvında adliyecilerniñ kassatsion şikâyetleri ve iş berilmesi uyğun körülmedi», – dep bildirdi matbuat hızmeti Qırım.Aqiqat mühbirine.

Svetlana Sidorkina
Svetlana Sidorkina

Aleksandr Kolçenkonıñ adliyecisi Svetlana Sidorkina şikâyet baqılmaycağını matbuat vastalarından ögrendi.

«Anda öyle bir nizam: vesiqala Yuqarı mahkemege kele. Yuqarı mahkemeniñ mahkemecisi vesiqalarını tedqiq etip, taqiqatnı ğayrıdan başlatmağa qarar alsa, taraflarğa bildire. Mında vesiqalar baqıldı, amma, añlağanıma köre, mahkeme şikâyetni baqmamağa qarar alğan», – dep ayttı o Qırım.Aqiqat mühbirine.

Onıñ bildirgenine köre, qırımlılarnıñ adliyecileri Yuqarı mahkeme şikâyetlerini baqıp, cinayet tasnifini deñiştirir, dep ümüt etken ediler.

Berilgen malümatqa köre, 2015 senesi avgust ayında Şimal-Kavkaz bölge arbiy mahkemesi kinorejissör Oleg Sentsov ve faşizm ile küreşken Aleksandr Kolçenkonı 20 ve 10 yılğa qadar azatlıqtan marum qaldırdı. Qırımlılar «Pravıy sektor» isyan-terrorist taqımında iştirak etüv ile qabaatlandı. Qırımnıñ mabusları ve olarnıñ imayecileri qabaatnı sebepsiz tanıp, siyasetnen bağlaylar. Rusiyeniñ «Memorial» uquq qorçalav merkezi de olarnı siyasiy mabus dep tanıdı.

«Bizim fikirimizce, olarnıñ qabaatında qayd etilgen areketler yañlış bir şekilde tasnif etildi. Anda böyle bir cinayet yoq edi. Amma Yuqarı mahkeme buña qulaq asmadı», – dep ayttı Svetlana Sidorkina.

Nadejda Savçenko örnegi

Al-azırda Oleg Sentsov Yakutiyanıñ ceza apishanesinde yata. Tatası Natalya Koçneva Qırım.Aqiqatqa bildirgenine köre, o, apis şartlarından şikâyetçi degil ve memuriyet tarafından basqı altında qalmağanını bildire.

«Oleg Yakutskt, ekstraditsiyağa ve tezden Kyivge kelecegine ümüt ete, 4 stsenariy yazdı, şimdi yazmay. Anda avalar suvuq olğanını ayta, amma dayana, apishanedeki insanlarnen munasebetleri yahşı, mektüpler ala. Diger siyasiy mabuslarğa baqqanda oña basqı yapılmay, Ceza izolâtorına (ŞİZO) tüşmegen edi», – dep ayta Natalya Koçneva.

Aleksandr Kolçenko Çelâbinsk vilâyetiniñ Kopeysk şeerinde cezasını çeke. Yatqan apishaneniñ yaramay tarihı bar

Aleksandr Kolçenko Çelâbinsk vilâyetiniñ Kopeysk şeerinde cezasını çeke. Yatqan apishaneniñ yaramay tarihı bar: 2012 senesi mahkümler isyan çıqarğan edi. Andaki memuriyet mahkümlerden para talap etken edi, red cevabını bergenler ise zorbalıqqa oğrağan edi.

Çelâbinsk Cemaat nezaret komissiyasınıñ azası (CNK) Tatyana Şçur bildirdi ki, bu davadan soñ vaziyet deñişti ve matbuat vastaları ve uquq qorçalayıcılar apishanedeki vaziyetni diqqatnen nezaret eteler.

CNK azası aytqanına köre, o, işdeşlerinen beraber Aleksandrnı ziyaret etip, ceza şartlarını kontrol ete. Qırımlı apishanege tüşkende onı eki kere Ceza izolâtorına yollağan ediler. Uquq qorçalayıcı bildire ki, o vaqıt para cezası içün bir sebep yoq edi, memuriyet Aleksandrğa basqı yapacaq edi. Amma soñra böyle bir şey tekrarlanmadı.

Aleksandr Kolçenko
Aleksandr Kolçenko

«Aleksandr taqımdaki insanlarnen yahşı munasebette buluna. Ruhiyatçımız ile beraber onı ziyaret etken edik, bizge güzel yanaştı. Bütün suallerge cevap berdi. Ruhiyatçı maneviy alı güzel olğanını qayd etti», – dedi Tatyana Şçur.

Onıñ bildirgenine koyer, Aleksandr kelecegini qasevet etip, vaqıt coyğanına yazıqsına. O, çoq oqumağa tırışa, apishanede, Rusiyege köre, büyük bir kütüphane bar.

Apishanede Aleksandr Kolçenkoğa iş teklif etildi, amma o, çalışmağa istemedi

Apishanede Aleksandr Kolçenkoğa iş teklif etildi, amma o, çalışmağa istemedi. Tatyana Şçurnıñ aytqanına köre, qırımlı çalışıp, vaqıtnı boş keçirecegini tüşüne, andaki aylıqlar pek alçaq. Yaqında anası Larisa Kölçenko Aleksandrnı ziyaret etti. Onıñ aytqanına köre, eñ çoq Nadejda Savçenkonıñ azat etilmesini laf ettiler.

Qırımlılarnıñ adliyecileri olar da bu şekilde vatanlarına qaytacaqlarına ümüt eteler.

«Savçenko olğan olsa, başqaları da olur. Añlaşma meselesi bar», – dep qayd etti Svetlana Sidorkina.

Afanasyevniñ fırsatları ziyade

Mart ayında Ukraina Adalet nazirligi Rusiye Adalet sarayına mektüp yazıp, Oleg Sentsov, Aleksandr Kolçenko ve Gennadiy Afanasyevni qaytarmağa rica etti. Rusiye nazirligi mektüp baqılğanını ve vesiqalar ögrenilgenini bildirdi.

Adliyeciler olarnı Rusiye istihbaratçıları Aleksandr Aleksandrov ve Yevgeniy Yerofeyevni teslim etip almağa ümüt etken ediler. Amma Ukraina Nadejda Savçenkonı almaq içün olarnı teslim etti. Bir afta ögüne Gennadiy Afanasyev Moskvadaki «Lefortovo» apishanesine avuştırıldı. Onı cezasını çekken Sıktıvkara tüzetüv apishanesinden ketirdiler.

«Qırım dörtü işi» iştirakçileriniñ azat etilmesi Kyivniñ diplomat ğayretlerine ve Rusiye prezidentiniñ siyasiy iradesine bağlı

Gennadiy Afanasyev 2014 senesi dekabr ayında 7 yılğa qadar azatlıqtan marum qaldı. O, taqiqat ile añlaşıp, Oleg Sentsov ve Aleksandr Kolçenkoğa qarşı malümat berdi. Faqat mahkemede Gennadiy basqı altında qalıp, arqadaşlarına qarşı yalan malümat bermege mecbur olğanını aydınlattı. Soñra onı Komi Cumhuriyetine ceza çekmesi içün yolladılar, adliyecisi Aleksandr Popkovnıñ aytqanına köre, apishane memuriyeti oña basqı yaptı.

Al-azırda Gennadiyniñ eñ çoq azat olma fırsatları bar. Ukraina akimiyeti o ve daa bir ukrain siyasiy mabusı Yuriy Soloşenko qaytarıla bile, dep bildire. Aynı vaqıtta Rusiye prezidentiniñ matbuat kâtibi Dmitriy Peskov bir qaç kün evelsi Gennadiy Afanasyevniñ azat etilmesi mevzusında añlaşma bar olğanını tasdıqlap olamadı.

Ukrain uquq qorçalayıcıları qayd eteler ki, «Qırım dörtü işi» iştirakçileriniñ azat etilmesi Kyivniñ diplomat ğayretlerine ve Rusiye prezidentiniñ siyasiy iradesine bağlı. LetMyPeopleGo cemaat kampaniyasınıñ iştirakçisi Palina Brodik Ukraina ve Rusiye arasında siyasiy mabuslar meselesinde muzakereler faalleşkenine yavaş-yavaş ümütnen baqmağa başlay.

Ukraina ve diger memleketlerde Sentsov-Kolçenko işi şahıslarınen birdemlik kampaniyası devam ete

«LetMyPeopleGo kampaniyası çerçivesinde baqılğan işlerniñ sebebi siyasettir. Böylece, ukrainlerniñ azat etilmesi içün taraflar arasındaki siyasiy añlaşma olmalı. Bu mefa olaraq resmiyleştirilip, Rusiye Federatsiyasınıñ yañı daa belli olmağan vatandaşlarına almaştıruv ola bile», – dep qayd etti faal.

Ukraina ve diger memleketlerde Sentsov-Kolçenko işi şahıslarınen birdemlik kampaniyası devam ete. «Birdemlik komiteti» Kyiv birleşmesiniñ faalleri mayıs 26-dan iyün 4-ke qadar qoltutuv aftasınıñ keçirilmesini ilân ettiler. Kyiv, Harkiv, Moskva, Leipzigde Qırımnıñ siyasiy mabuslarına qoltutuv aktsiyaları olıp keçti, Krakov ve Berlinde bunıñ kibi tedbirlerniñ ötkerilmesi beklenile.

XS
SM
MD
LG