Link açıqlığı

Saatnıñ esas haberi

Mayıs 25-ke keçer gecesi Bağçasarayda şeer şurasınıñ sabıq deputatı, Dünya qırımtatar kongressi icra komitetiniñ azası Ervin İbragimov ğayıp oldı. Onıñ maşinası orta yolda tapıldı. İçtimaiy ağlarda bir video peyda oldı, levhada Rusiye yol politsiyasınıñ hadimleri onı yaqalaylar. Babası Ümer İbragimov işğal etilgen Qırım prokurorı, politsiya, taqiqat komiteti ve Federal havfsızlıq hızmetine muracaat etip, oğlunı tapmağa rica etti.

Yolnıñ ortasında turğan açıq maşina, «içinde – ne insan, ne vesiqa bar», – dep ayta ğayıp olğan Ervin İbragimovnıñ babası. Ümer İbragimov oğlunen mayıs 24-te aqşam laf etken edi.

Qapusını açtım, baqsam – anahtarı yerinde, «qutusı» açıq, oğlum yoq. Telefonı da yoq
Ümer İbragimov

«Aqşam saat 11-lerde telefon etip, maşina vesiqalarını tapmağa rica etti. Olarnı masada unuttım, belki, dedi. Yoq – dedim. Soñra bir qaç kere telefon ettim, amma telefon blok etilgen edi. Saba işke ketkende baqsam, maşinası tura. Qapusını açtım, baqsam – anahtarı yerinde, «qutusı» açıq, oğlum yoq. Telefonı da yoq. Böyle bir şey ilk sefer ola, keç qalğanda aytqan edi er vaqıt, mında ise... Yaramay bir şey tüşünmek istemeyim, er şey yahşı olacağına ümüt etmek isteyim», – dep bildirdi Ümer İbragimov.

Babası politsiyanı çağırğanını ayttı, olar maşinanı baqıp, parmaq izinlerini alğanlar ve protokol tizip ketkenler.

Soñra qırımtatar faali ğayıp olğan noqtağa yaqın bir yerde yerleşken tükân kamerasından video peyda oldı. Qırımtatar Milliy Meclisi reisiniñ birinci muavini Nariman Celâl bildirdi ki, videoda yol politsiyasınıñ hadimleri bar, olar İbragimovnı zornen tutıp yaqaladılar.

Meclis reisiniñ muavini İlmi Ümerov Radio Svobodağa bildirdi ki, İbragimov onıñ artından insanlar yürgenini aytqan edi.

Adam qaçırıldı
İlmi Ümerov

«Adam qaçırıldı. Mayıs 17-de Ervin artından Skoda Octavia maşinası yürgenini kördi. Mayıs 18-den soñra bir daa körmedi onı. Mında uquq qoruyıcılar ya da «samooboronanıñ» işi olsa, olarnıñ maqsadı deñişmey – qırımtatarlarnı qorquzmaq isteyler. Qayda olğanını bilmeymiz. Belki, yaşamay endi», – dep ayta Ümerov.

İlmi Ümerovnıñ bildirgenine köre, Meclis azaları politsiya ve FSB Qırım bölüginde faalniñ ğayıp oluvınen bağlı malümat ögrenmege tırıştılar. Faqat olarnıñ iç bir haberi yoq.

Refat Çubarov
Refat Çubarov

Mayıs 25-te Kyivde Qırımtatar Milliy Meclisiniñ toplaşuvı keçirilecek, dep bildirdi temsil organınıñ reisi Refat Çubarov.

«Qorqunç bir şey, toplaşuv keçirip, oña ne oldı ögrenmege tırışamız. Daa bir qırımtatarı, daa bir faal qaçırıldı. Sebep ne olsa olsun, maqsat bir – qırımtatarlar arasında qorqu tamırları atıla, insanlarnı Qırımnı terk etmege mecbur etecek olalar», – dep qayd etti Çubarov.

Qırımtatarlarnıñ aq-uquqlarını qoruv komitetiniñ reisi Eskender Bariyev bildirdi ki, Meclis ukrain ve halqara uquq qorçalayıcı teşkilâtlarınıñ beyanatlarını bekley.

Adamnı zornen maşinağa oturtıp, belli olmağan bir yerge alıp kettiler
Eskender Bariyev

«Adamnı zornen maşinağa oturtıp, belli olmağan bir yerge alıp kettiler. Qırımda ilk sefer insan ğayıp olmay. Ne içün o? Cinayet ne maqsatnen yapıldı, bu cinayettir – çünki buña daa ne denile bile? Bunı mahsus hızmetler yapqan olsa bile, bunı gece yapmağa aqqları yoq. Ervinge resmiy bir celpname kelse edi, o, bilgili, tasilli bir insan olaraq taqiqat komitetine özü kelir edi. Amma mında tam bir cinayet olğanını köremiz – gece insanlarnı qaçıralar», – dedi Eskender Bariyev.

Ervin İbragimov – qırımtatar milliy areketiniñ faali, Dünya qırımtatar kongressi icra komitetiniñ azası, regional Meclis azası, Bağçasaray şeer şurasınıñ sabıq deputatı. Mayıs 25-te Meclis azalarınen beraber Sudaqqa baracaq edi, anda qırımtatar faallerini mahkeme eteler.

Qırım işğalinden soñ yarımadada insanlar ğayıp ola, çoqusı – qırımtatarlar. Rusiye kontrol etken Qırımnıñ Taqiqat komiteti ise «yarımadada qırımtatarlar ğayıp olmay», dep bildire.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG