Mahsus Qırım.Aqiqat içün
Ukrainanıñ qırımtatarı olğan Jamalanıñ İsveçiyadaki «Eurovision» yarışında ğalebe qazanması şimdiki vaziyette zarur olğan birleştirgen faktorlardan biri oldı.
Yırcı Ruslananıñ İstanbuldaki aynı yarışta ğalip çıqması, birinci Maydan, ağa-qardaş Kliçkolarnıñ ğalebe qazanğan uruşları, Andriy Şevçenkonıñ «Altın topu», Ukraina cıyma taqımınıñ futbol boyunca dünya ve Avropa çempionatında muvafaqiyetli oyunlarından bayağı vaqıt keçti. Bu vaqialar devletimizni birleştirip, problemlerni unutmağa mecbur ete ve Lvivden Luganskqa qadar, Çernigovdan Yaltağa qadar, Harkivden Odessağa qadar insanlarnıñ yüreklerini titretken ediler.
2014-2015 seneleri ekinci Maydan onıñ yeñişleri ve Kök yüzü qaramanlarına olğan ürmetimizni aytmasaq, eki taraflı teessurat qaldıra. Bir taraftan, Ukraina akimiyetni eline keçirgen ükümdar ve qorantasından qurtuldı, olar soñki yılları 2004 senesi Portaqal inqilâbı neticesinde qazanılğan demokratiya içün bir telüke olğan ediler.
Diger taraftan ise, böyle bir devrim zararlı ve masraflı oldı. Belli olmağan vaqıtqa qadar strategik topraqlar, olarnen beraber ise ukrain dep bilingen bir çoq şeyge – devlet, timsal, til, medeniyet, anane, kimlikke – şübenen baqqan millionlarnen vatandaşnı ğayıp ettik. Donbasstaki cenk, biñlernen qurban ve yaralanğanlar; Rusiye ile munasebetlerde teren bir zıddiyet; Yanukoviçniñ akimiyeti yol bergen iqtisadiyattaki buhran ve ilâhre.
Bunıñ kibi vaziyetlerde keçirilecek islâat ümütleri irip kete, em Ukrainanıñ, em de diplomatik tilde ortaq sayılğan memleketlerniñ sabrı aman-aman bitecek
Bunıñ kibi vaziyetlerde keçirilecek islâat ümütleri irip kete, em Ukrainanıñ, em de diplomatik tilde ortaq sayılğan memleketlerniñ sabrı aman-aman bitecek. Ukraina siyasetçileri müim olğanda bir-birinen añlaşıp olamaylar, bu «unikal» qabiliyetni ayrıca qayd etmek kerek. Neticede, cemaat yuqarıdaki qavğalardan boldura, böylece aşağıdakiler de añlaşıp olamay, bir çare tapılmay, insanlar qaçıp ketken prezident devrini sağınmağa başlay.
Ukraina temsilcisiniñ Avropada (qısmen, Avrasiya ve dünyada) populâr olğan yarıştaki ğalebesi – devlet ve onıñ vatandaşları içün bir bonus, onıñ memleket içinde birleştirme faktorı bar.
Zor künlerni yaşamaqta olğan Ukraina qısqa bir müddetke bütün içki ve tışqı qasevetlerini unuttı. İçtimaiy ağlarğa baqsañ, cemaat da öyle, birlik, vatanperverlik ve soñki vaqıtları pek yetişmegen öptimizm is etile. Ukrainada akimiyet deñişken soñ peyda olğan bütün menfiy duyğularnıñ da sıñırları bar, bunı añlaysıñ.
Jamalanıñ İsveçiyada qazanğan ğalebesiniñ daa bir müim tarafı bar. Yırcınıñ tamırlarını alsaq, «rus» yarımadasında yaşağan ve bu müitni qabul etmegen qırımtatarlarnıñ büyük qısmı içün semetdeşiniñ ğalebesi taze ava kibi oldı. Soñu olmağan tintüv, sorğu, mahkeme ve çeşit türlü yasaqlar şeklinde yapılğan basqı şaraitlerinde bu pek müim.
Qırımtatarlar, qırımlılar ve, umumen, Qırımnı esas Ukraina ile bağlağan ince maneviy ve maddiy yipler kün-künden üzüle, amma bu yeñişten soñ ğayrıdan bağlanmasa da, iç olmağanda qısqa bir müddet devamında üzülmeycek
Qırımtatarlar, qırımlılar ve, umumen, Qırımnı esas Ukraina ile bağlağan ince maneviy ve maddiy yipler kün-künden üzüle, amma bu yeñişten soñ ğayrıdan bağlanmasa da, iç olmağanda qısqa bir müddet devamında üzülmeycek.
Kim bile, belki Qırımlı qıznıñ ğalebesi Ukraina devletini ğayıp etken yarımadağa nisbeten siyasetniñ yañı derecesine keçmege mecbur eter, Rusiye ise tamır halqına olğan munasebetini deñiştirir.
Andrey Suleymanov, qırımlı
«Fikir» rubrikasında bildirilgen fikir-tüşünceler müelliflerniñ noqtaiy nazarını aydınlatıp, muarririyet baqışlarınen aynı olmaması mümkün