Qırımda Rusiyege boysunğan akimiyet regional meclislerge mayıs 18-de qırımtatar sürgünligine bağışlanğan matem merasimlerini keçirmek içün razılıq bermey.
Bu aqta Qırım.Aqiqatqa bergen izaatta Qırımtatar Milliy Meclisi reisiniñ birinci muavini bildirdi.
Onıñ malümatına binaen, Qırımtatar Milliy Meclisi Sürgünlik qurbanlarını añma künü merkeziy merasimlerni keçirmek içün ariza bermemege qarar aldı. Celâlnıñ añlatqanına köre, böyle muracaatnıñ mantığı yoqtır, çünki «neticesi bellidir».
«Regional meclislerge merasimlerni keçirmege tevsiye ettik ve bazı rayonlarda ariza berdik. Hususan, Sudaqta matem merasimini keçirmek içün ariza berildi, onı red ettiler. Aynı vaziyet Krasnoperekopskta oldı, amma o yerde zenaatdaşlarımız areketlerini devam etti, olar miting keçirilmesi red etilgeni içün mahkemege muracaat etmege planaştıralar. Bazı yerlerde ariza bermedik, adamlar toplaşacaq, qırımtatar sürgünligi genotsidiniñ qurbanlarına bağışlanğan abidelerge çiçekler qoyacaqlar», – qayd etti Celâl.
Onıñ bildirgenine köre, rayonlarda akimiyet meclis temsilcilerine beraberlikte merasimler keçirmege teklif eteler.
«Çoqusı allarda red eteler, çünki ükümet, bu cümleden yerli akimiyet, o qadar özlerini itibardan tüşürdiler da, adamlar bu matem kününi daima yalan aytqan kişilerniñ yanında keçirmege istemey. Ükümet bazı resmiy merasimlerni teşkil etmege istey, amma ne men, ne zenaatdaşlarımdan kimse olarda iştirak etmeycektir», – dep qayd etti Meclis reisiniñ birinci muavini Nariman Celâl.
Mayıs 16-da Rusiyege boysunğan Qırım ükümeti mayıs 18-de keçirilecek Qırımdan sürgünlik qurbanlarınıñ hatırasına bağışlanğan merasimlerniñ cedvelini taqdim etti.
Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.
Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.
Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
