Mayıs 16-da Rusiyege boysunğan Aqmescit akimiyeti mayıs 18-de keçirilecek Qırımdan sürgünlik qurbanlarınıñ hatırasına bağışlanğan merasimlerniñ cedvelini taqdim etti. Rusiyeli Aqmescit memuriyetiniñ saytında bildirilgen malümatqa binaen, merasimler şeerdeki memorial abidelerge çiçeklerniñ qoyulmasınen başlanacaq.
Böyleliknen, çarşenbe künü çiçekler saat 9:00-da demiryol vokzalı yanındaki şeer bağçasında, saat 9:20 Qırım Federal universiteti yanındaki abidege, saat 9:40 Qırım müendislik ve pedagogika universitetindeki abidege qoyulacaq.
Plan boyunca, üyle vaqtında Bağçasaray rayonındaki Süyren demiryol stantsiyası yanında Qırımdan sürgünlik qurbanlarına bağışlanğan memorial kompleksiniñ açılış merasimi keçirilecek. Süyren stantsiyasından 1944 senesi mayıs 18-de Orta Asiyağa qırımtatarlarnen ilk eşelon yollanıldı.
Saat 19:30 Aqmescitteki Lenin meydanında «Yüregiñde çıraq yaq» aktsiyası teşkil etilecek.
Bildirilgen malümatqa köre, mayıs 18-de Qırımnıñ bütün camilerinde ve kilselerinde sürgünlik qurbanlarınıñ hatırasına dua merasimleri keçirilecek.
Bundan evel ameldeki Aqmescit akimiyeti Sürgünlik qurbanlarını añma kününe bağışlanğan uyğunlaştırılmağan aktisyalarnı keçirmekten vazgeçmege tenbiyeledi.
Qırımtatar Milliy Meclisiniñ reis muavini Nariman Celâlnıñ Qırım.Aqiqatqa bergen izaatta bildirgenine köre, Rusiyege boysunğan Qırım ükümeti qırımtatar halqınıñ sürgünligi qurbanlarını añma kününe bağışlanğan kütleviy aktsiyalarnı yarımadada keçirmege bermez O, qırımtatarlar matem mitingini keçirmek içün ep bir ükümetke ariza bereceklerini qayd etti.
Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.
Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.
Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
