Link açıqlığı

Mayıs 12-de Qırımda Bağçasarayda musulmanlarnıñ evlerinde tintüvler keçirile. Bunı Qırımtatar Qurultayınıñ Merkeziy saylav komissiyasınıñ reisi Zair Smedlâyev bildire.

Onıñ malümatına binaen, tintüvler Qırım musulmanlarınıñ 5 evinde keçirile.

«Tünevin ombudsmen ile qonuştıq, bugün reaktsiya körüne. Bağçasarayda tintüvler başlandı», – dep yazdı Smedlâyev Facebook saifesinde.

«Adet üzre, çoq silâlı, maskalı, işaretlengen insanlar», – bildire o.

Qırımtatar Qurultayınıñ Merkeziy saylav komissiyasınıñ reisi bunı «qırımtatarlarnı nevbetteki qorquzma aktsiyası» dep adlandırdı.

«Qırımtatarlarnı nevbetteki qorquzma aktsiyası mayıs 18 arfesinde. Bu kün keçken sene yaqalanğan Qırım musulmanlarını maküm etecekler. Bağçasarayda kütleviy tintüvler. Silâlı, maskalı insanlar ile avtobuslar», – qayd etti Smedlâyev.

Tintüv aqqında Bağçasaraydaki qavehane hadimleri de bildire.

«Salaçıq Qaravan-sarayında kütleviy tintüv keçirile. Silâlı insanlarnen eki avtobus keldi. Lâqayt olmağanlar, bizge kelmeñizni rica etemiz. Siziñ destegiñiz ve yardımıñızğa muhtacmız», – dep yazıla qavehaneniñ Facebook saifesinde.

Diger tafsilâtlı malümat daa bildirilmey.

Qırımda rusiyeli uquq qoruyıcı müessiseleriniñ bu vaqia boyunca izaatları yoq.

Bundan evel Rusiye ombudsmeni Tatyana Moskalkova Qırımtatar Milliy Meclisiniñ temsilcileri ile körüşkeni aqqında bildirile edi.

Ukrain ve halqara uquq qoruyıcı teşkilâtları Qırım Rusiye tarafından işğal etilgen soñ yarımadada insan aqları bozulğanı aqqında ilân ete edi. Rusiye ükümeti tarafından eñ büyük basqın qırımtatarlar ve yarımadada yaşağan ukrain tarafını tutqanlarğa qarşı yapıla.

Rusiyege boysunğan Qırım ükümeti uquq qoruyıcılarnıñ yarımadada insan aqları bozulması aqqında malümat qabartılğan, dep ayta.

Mayıs 12-de Avropa Parlamentinde Rusiye tarafından işğal etilgen Qırımda qırımtatarlarnıñ aq-uquqları bozulması meselesi muzakere etilecek.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG