Link açıqlığı

Meclis temsilcileri işğal etilgen Qırımda Rusiyede İnsan aqları boyunca vekaletli Tatyana Moskalkova ile qonuştı. Bu aqta körüşüv iştirakçilerinden biri olğan, Meclis reisiniñ birinci muavini Nariman Celâl bildirdi.

«Bugün saat 15:00-te Qırımtatar Milliy Meclisiniñ temsilcilerini Rusiye Federatsiyasında İnsan aqları boyunca vekâletli Tatyana Moskalkova ile körüşüvge davet ettiler... Moskalkova hususan biznen qonuşmağa aves etkeni sayesinde ayrı qısqa körüşüv keçirildi, körüşüvde Qırımda insan aqları boyunca öz fikirlerimizni bildirmege tırıştıq», – dep yazdı Celâl Facebook saifesinde.

Nariman Celâlnıñ qayd etkenine köre, Meclis temsilcileri körüşüvde «ükümet yanındaki teşkilâtlarnıñ» bulunmamasını şart olaraq qoydı. Bunen beraber, Meclis reisiniñ birinci muavininiñ bildirgenine binaen, körüşüv başlanmasına bir qaç daqqa qalğanda Qırım ombudsmeniniñ ofisine «üç insan keldi: spiker muavini, baş nazir muavini ve Devlet milletlerara munasebetler boyunca komitetiniñ yolbaşçısı».

Bundan evel Rusiye ombudsmeniniñ matbuat hızmetinde mayıs 11-14 künleri Tatyana Moskalkova yañı vazifesinde ilk iş ziyaretinen Qırımğa kelecegini bildirdi.

Ziyaret programmasında yarımada ve Aqyarnıñ şimdiki reberleri, Qırım prokurorı, uquq qoruyıcı teşkilâtları ve Qırımtatar Qurultayı temsilcilerinen körüşüvlerniñ keçirilmesi planlaştırıla.

Bundan da ğayrı, Tatyana Moskalkova Aqmescitteki 1 sanlı SİZO-nı ziyaret etmege, Aqyarnıñ memorial kompleksleriniñ birinde Qırım imayecileriniñ hatırasını añmağa planlaştıra.

Rusiye ombudsmeni mayıs 11-de Aqmescitte ve mayıs 13-te Aqyarda vatandaşlarnen körüşecek.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG