Link açıqlığı

Ukraina Yuqarı Radası Birleşken Milletler Teşkilâtı, Avropa parlamenti, Avropa Şurası parlament assambleyası ve dünya liderlerine muracaat etip, qırımtatar halqı genotsidiniñ qurbanları hatırasını añmağa ve Rusiye tarafından qırımtatarlarnıñ aq-uquqları ve serbestligi bozulğanını takbih etmege çağırdı.

Bu muracaatqa mayıs 11-de 240 halq deputatı rey berdi. Oña «Oppozitsionnıy blok» («Muhalifet bloku»), «Vidrocennâ» ve Radikal firqa deputatlarınıñ ekseriyeti qoltuttı.

Ukraina parlamenti halqara toplulıqnı 1944 senesi qırımtatar halqı sürgünligini genotsid olaraq tanımağa çağırdı

Ukraina parlamenti halqara toplulıqnı 1944 senesi qırımtatar halqı sürgünligini genotsid olaraq tanımağa ve mayıs 18-de facia qurbanlarını añma tedbirlerine qoşulmağa çağırdı.

Yuqarı Rada halqara teşkilâtlarnı Qırımnıñ Rusiye akimiyeti tarafından Meclis faaliyetiniñ yasaqlanmasını ve arizada «etnotsid» olaraq keçken qırımtatar halqı aq-uquqlarınıñ bozulmasını takbih etmege çağıra.

Qırımtatar halqına ve Ukraina vatandaşlarına ardı-sıra yapılğan basqı ve repressiyalar qırımtatar halqı etnotsidiniñ siyasetidir

«Ukrainanıñ vaqtınca işğal altında qalğan topraqlarında Rusiye Federatsiyasınıñ devlet organları tarafından qırımtatar halqına ve Ukraina vatandaşlarına ardı-sıra yapılğan basqı ve repressiyalar, qırımtatarlar, Qırımtatar Milliy Meclisi ve Qırımtatar Milliy Qurultayı kibi organlarınıñ etnik ve siyasiy sebeplerden taqip etilmesi işğal başından itibaren qırımtatar halqı etnotsidiniñ siyasetidir», – dep aytıla muracaatta.

2015 senesi noyabr 12-de Ukraina Yuqarı Radası 1944 senesi qırımtatar sürgünligini genotsid olaraq tanıdı.

Mayıs 18 – qırımtatar halqınıñ Qırımdan sürgün etilmesiniñ qurbanlarını añma künüdir. 1944 senesi bu künde qırımtatarlarnen tolu birinci eşelon Qırımdan Orta Asiyağa yollandı. Umumen 180 biñ insan sürgün etilgen edi.

Yıl-yıldan Qırımda sürgünlik kününiñ yıllığına bağışlanğan kütleviy tedbirler, şu cümleden paytahtnıñ merkezinde matem mitingi keçirilgen edi. Faqat 2014 senesi mart ayında Rusiyeniñ yarımada işğalinden soñ bunıñ kibi aktsiyalarnıñ Aqmescit merkezinde ötkerilmesi yasaq etildi.

Kyiv ve Ukrainada bir sıra tedbir keçirilecek: mitingler, qırımtatar halqı sürgünliginiñ yıllığına bağışlanğan dersler.

2016 senesi aprel ayında Rusiye kontrol etken Qırım Yuqarı mahkemesi Qırımtatar Milliy Meclisiniñ faaliyetini yasaq etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG