Link açıqlığı

Rusiye tarafından işğal etilgen Qırımda mayıs 10-da uquq qoruyıcılar Ay-Petride ticariy noqtalarnı teşkerdi. Bu aqta adliyeci Emil Kurbedinov Facebook saifesinde bildirdi.

Onıñ malümatına binaen, reydni silâlı uquq qoruyıcılar keçirdi, satıcılarnıñ bazıları, hususan qırımtatarlar, ticaretni qapatıp ketmek mecbur oldı.

«Ay-Petri boyunca böyle beyanat keldi: «Eñ azdan 50 silâlı insan. Vesiqalar teşkerüvi (adiy), parmaq izlerini alalar! Malümat 100%», – dep yazdı Kurbedinov.

Uquq qoruyıcılarnıñ ziyareti aqqında malümatnı yerli iş adamları da tasdıqladı. Qırım.Aqiqatqa bergen izaatta olar uquq qoruyıcılar, nezaret strukturalarınıñ temsilcileri bu areketlerni plan boyunca keçirilgen teşkerüv dep adlandırğanlarını ve ticaretke ruhset bergen vesiqalarnı talap etkenlerini bildirdiler.

«Teşkerüv keçirildi. İnsanlarnı, iş adamlarını teşkereler. Er vaqıt olğanı kibi, vesiqalarnı teşkereler. Militsiya, prokuratura, bergi hızmeti... Teşkerüv keçirile, olar bergi nizamını teşkereler, patent barmı yoqmı, ücretli işçiler barmı yoqmı, ve qavehane vesiqalarını teşkereler. Topraq kirası, töleylermi yoqmı», – dep añlattı iş adamlarından biri.

Onıñ qayd etkenine köre, mayıs bayramlarından soñ ticariy noqtalarnıñ saipleriniñ çoqusı bu yerde degil edi. Bunıñ içün yaqın vaqıtta Ay-Petride tekrar teşkerüvlerniñ keçirilmesi beklenile.

İnsan aqları boyunca Qırım kontakt gruppasınıñ idarecisi Abdureşit Cepparov Qırım.Aqiqatqa bergen izaatında bu yarımadada qırımtatarlarğa qarşı yapılğan böyle reydlerniñ devamı olğanını tahmin etti: «Şimdilik başqa malümat yoq. Ğaliba, «Vostoçkada» (Kezlevdeki qavehane – QA) olğanı kibi ve diger reydler. Şimdilik tek tahmin ete bilemiz», – dedi Cepparov.

Mayıs 7-de mühbir Osman Paşayev Kezlev merkez bazarında rusiyeli uquq qoruyıcılar 25 qırımtatarnı tutqanını bildirdi. Onıñ sözlerine köre, uquq qoruyıcılar yaqalanuvlar Krasnodarda bir qorantanı öldürgen şahıslarnı tutma operatsiyasınen bağlı olğanını añlattılar.

Adliyeci Emil Kurbedinov mayıs 6-da cuma namazından soñ Molodöjnoye köy camisinde 50-den ziyade uquq qoruyıcı yüz musulmannı tutıp, belli olmağan tarafqa alıp ketkenlerini bildirdi. Bundan soñ o, insanlar avtobuslardan azat etilgenini, amma olardan politsiya bölügine mustaqil şekilde kelmelerini talap etkenlerini bildirdi.

Qırım işğal etilgen soñ yarımadada qırımtatarlarnıñ evlerinde, camilerde tintüvler daa sıq oldı, dep bildireler Meclis temsilcileri ve uquq qoruyıcılar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG