Link açıqlığı

Amerika Qoşma Ştatları Qırımda qırımtatarlarnıñ kütleviy şekilde yaqalanuvına izaat berdi


Amerika Qoşma Ştatları Aqmescit rayonındaki Molodöjnoye köy camisinde cuma namazından soñ qırımtatarlarnıñ kütleviy şekilde yaqalanuvı içün raatsız olğanını bildirdi.

Bu aqta AQŞ Devlet departamentiniñ Ukrinformğa bergen resmiy mektüp-cevabında bildirile.

«Qırımdan kelgen bu kibi haberlerden raatsızlanamız. Qırımtatarlar Rusiye tarafından işğal etilgen Qırımda repressiyalar ve ayırımlarğa oğramağa devam ete», – dep qayd etile vesiqada.

Bunen beraber Devlet departamentinde yarımadada qırımtatarlarğa qarşı yapılğan diger bozuvlarğa, bu cümeden sorğular, köteklemeler, qanunsız apiste tutmalar, ve şahsiy evlerde ve camilerde politsiya tarafından keçirilgen tintüvlerge de diqqat ettiler.

«Bu zalımlıqqa ve insan aqları bozulmasına noqta qoymaq kerektir», – dediler amerikalı tışqı siyaset müessisesinde.

«Biz kene de Rusiyeni Qırım işğalini toqtatmağa çağıramız. Qırımnen bağlı sanktsiyalarımız Moskva işğalni toqtatmağance devam etecek», – dep qayd ettiler AQŞ Devlet departamentinde.

Mayıs 6-da cuma namazından soñ Molodöjnoye köy camisinde 50-den ziyade silâlı insan musulmanlarnı yaqaladı.

Qırım ve Sevastopol şeeri musulmanları diniy idaresinde (QMDİ) Rusiyege boysunğan Qırım uquq qoruyıcı organları Molodöjnoye köy camisi ziyaretçileriniñ vesiqalarını teşkergen soñ Qırım musulmanlarına şahıs şeadetnamelerini yanında taşımağa tevsiye ettiler.

Yüz bergen vaqia boyunca Qırımnıñ rusiyeli uquq qoruyıcı müessiseleriniñ resmiy izaatları yoq.

Qırım Rusiye tarafından işğal etilgen soñ qırımtatarlarnıñ evlerinde, camilerde pek çoq tintüvler keçirilip başladı, bunı Meclis ve uquq qoruyıcılar qayd ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG