Link açıqlığı

Molodöjnoyede yüz bergen vaqiadan soñ QMDİ Qırım musulmanlarına «diqqatlı olmağa» ve vesiqalarnı yanında taşımağa tevsiye ete


Ukraine, Crimea - Belogorsk opened mosque 24Apr2015

Qırım ve Sevastopol şeeri musulmanları diniy idaresinde (QMDİ) Rusiyege boysunğan Qırım uquq qoruyıcı organları Molodöjnoye köy camisi ziyaretçileriniñ vesiqalarını teşkergen soñ Qırım musulmanlarına şahıs şeadetnamelerini yanında taşımağa tevsiye ettiler.

QMDİ matbuat hızmetinde, uquq qoruyıcılarnıñ malümatına esaslanıp, yüz bergen vaqia teşkerüv olğanını bildirdiler.

«Köçüv qanunlarınıñ bozulmamasını teşkermek maqsadınen keçirilgen operativ-qıdıruv tedbirlerniñ sebebi camide ya da onıñ yanında iqamet izini ve vatandaşlığı olmağan Orta Asiya regionından şahıslarnıñ yaşabilmeleri oldı», – dep qayd ettiler QMDİ matbuat hızmetinde.

Muftiyatta qayd etkenlerine köre, teşkerüvler cuma künü keçirildi, bu kün ise musulmanlar içün muqaddestir, ve musulmanlar içün bu vaqia «menfiy keldi».

«QMDİ vatandaşlarğa özüne ve bir-birine diqqatlı olmağa, şübe doğurğan insanlarğa diqqat etmege muracaat ete, ve yanında şahıs şeadetnamelerini taşımağa çağıra», – dep bildirdiler matbuat hızmetinde, ve mayıs 6-da vesiqalar teşkerilgen soñ bütün musulmanlar evge yiberilgenini qayd ettiler.

Mayıs 6-da cuma namazından soñ Molodöjnoye köy camisinde 50-den ziyade silâlı insan musulmanlarnı yaqaladı.

Yüz bergen vaqia boyunca Qırımnıñ rusiyeli uquq qoruyıcı müessiseleriniñ resmiy izaatları yoq.

Qırım Rusiye tarafından işğal etilgen soñ qırımtatarlarnıñ evlerinde, camilerde pek çoq tintüvler keçirilip başladı, bunı Meclis ve uquq qoruyıcılar qayd ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG