Link açıqlığı

Cemilevniñ oğlu Hayserni şartlı olaraq azat etmege red ettiler ve kene de Rusiye vatandaşlığını almağa mecbur eteler – adliyeci


Hayser Cemilev

Astrahan vilâyet mehkemesi qırımtatar halqınıñ lideri Mustafa Cemilevniñ oğlu Hayser Cemilevni müddetinden evel şartlı olaraq azat etmege red ettiler. Bu aqta adliyeci Nikolay Polozov aprel 28-de, cumaaqşamı künü Twitterde bildirdi.

Adliyeciniñ malümatına binaen, imaye etüvniñ nevbetteki adımı İnsan aqları boyunca Avropa mahkemesine bu qararnı lâğu etmege muracaat olacaqtır.

Polozovnıñ qayd etkenine köre, Hayser Cemilevge şartlı olaraq azat etüviniñ red etilmesi beklenilgen bir qarar edi, amma onı rusiyeli vatandaşlıqnı almağa mecbur etmek ıntıluvı beklenilmegen edi.

«Diger beklenilmegen şey oldı. Sabıq Federal köçüv hızmetiniñ malümatına binaen, Hayser Cemilev Rusiye vatandaşı olaraq qayd etilgen, amma 2014 senesi Rusiye vatandaşlığını resmiy şekilde red etken edi. Rusiye mahkemeleriniñ qararlarında Cemilev aynı Ukraina vatandaşı olaraq qayd etilgen. Amma apiske oña Rusiye pasportını yapmaq içün vesiqalar keldi», – qayd etti Polozov.

Bundan evel Polozov Rusiyede qırımtatar halqınıñ lideri Mustafa Cemilevniñ maküm etilgen oğlu Hayser Rusiye vatandaşlığını red etmek içün yañıdan ariza yazğanını bildirgen edi.

Rusiye Federatsiyasınıñ Yuqarı mahkemesi Krasnodar ülkesiniñ mahkemesi Hayser Cemilevge bergen 5 yıllıq apis cezasını bir buçuq yılğa qısqarttı. Kiyevniñ Dnepr mahkemesi 2015 senesi aprel ayında onı 3 yıl ve 8 ayğa qadar apiske almağa qarar aldı.

Hayser Cemilevni 2013 senesi mayıs 27-de onıñ Bağçasaraydaki evinde yaqalap, o yerde 44 yaşında Fevzi Edemovnı babasınıñ tüfeginden öldürgeninde qabaatladılar. Qırım işğal etilgen soñ rusiyeli taqiqat organları onıñ işini yañıdan baqmağa qarar aldı. Hayserni Aqmescit apishanesinden çıqarıp, Krasnodar vilâyetine alıp kettiler.

Hayser Cemilev 10 sanlı Astrahan apishanesinde buluna, çünki Rusiye onı Ukrainağa bermege red etti. Keçken sene iyül 10 künü İnsan aqları boyunca Avropa mahkemesi Hayser Cemilevni SİZOdan azat etmek qararını çıqardı. Rusiye bunı yerine ketirmedi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG